தமிழ் காமிக்ஸ் ரசிகர்கள்

The reurn of இரும்புக்கை மாயாவி - லயன் கம்பேக் ஸ்பெஷல் (Jan 2012)

2011-12-29T19:43:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

இந்த வருடம் (2011) நம் அனைவருக்கும் மிகவும் சோதனையாக அமைந்தது கண்டு வருத்தம் அடைந்தாலும், அடுத்தது என்ன என்று எதிர்நோக்குகையில் குகையின் முடிவில் வெளிச்சம் மிகவும் பிரகாசமாக தெரிகிறது. ஆமாம், தோழர்களே. நம்முடைய அபிமான லயன் காமிக்ஸ் இந்த இன்டர்நெட் யுகத்தில் அடியெடுத்து வைக்கிறது. அதன் முதல் கட்டமாக இதோ எடிட்டர் விஜயன் சாரின் பிரத்யேக வலைப்பூ:

http://lion-muthucomics.blogspot.com/

மீள்வருகையின் முதல் கட்டமாக அற்புதமான ஆர்ட் பேப்பரில் உயர்தர அச்சில் முழுவண்ணகலவையில் ஒரு மீள்வருகை சிறப்பு இதழ் தயாராகி வருகிறது. நேற்று சிவகாசி சென்ற நான் மேலும் பல விவரங்களை சேகரித்து வந்துள்ளேன். அதன் விளைவே இந்த பதிவு.

புத்தகத்தின் விலை: ருபாய் நூறு மட்டுமே.
புத்தகத்தின் அளவு: சைஸ் (சமீபத்தில் வந்த விண்வெளி கொள்ளையர் அளவு)
புத்தக பக்கங்கள்: இருநூறு பக்கங்கள்.
புத்தகத்தின் அமைப்பு: நூறு பக்கங்கள் முழு வண்ணத்தில் + நூறு பக்கங்கள் கருப்பு வெள்ளையில்.
புத்தகத்தில் உள்ள கதைகள்: ஐந்து
புத்தகம் கிடைக்குமிடங்கள்: லயன் காமிக்ஸ் அலுவலகம்,சென்னை புத்தக கண்காட்சி
எப்போது முதல் கிடைக்கும்: ஜனவரி பத்தாம் தேதி முதல்
புத்தகத்தை வாங்குவது எப்படி: ருபாய் 130 ஐ முன்பதிவு லயன் காமிக்ஸ் அலுவலகத்தில் செய்து வாங்கலாம். சென்னை வாசகர்கள் சென்னை புத்தக கண்காட்சியில் வாங்கலாம்.

லயன் காமிக்ஸ் மற்றும் முத்து காமிக்ஸ் வாசகர்கள் ஒரு விஷயத்தை நன்றாக யோசிக்க வேண்டும். தமிழில் தரமான அச்சில், நல்ல தாளில், தெளிவான சித்திரங்களுடன், திறமையான மொழிபெயர்ப்புடன் காமிக்ஸ் படிக்க வேண்டுமெனில் உடனடியாக லயன் காமிக்ஸ் அலுவலக எண்ணிற்கு போன் செய்து (04562-272649) சந்தா விவரங்களை கேட்டறிந்து சந்தா கட்டவும், உங்கள் வீடு தேடி காமிக்ஸ் புத்தகங்கள் வந்து சேரும். இந்த புத்தகத்தில் உள்ள கதை விவரங்கள்:

1. லக்கி லுக் ஒற்றர்கள் ஓராயிரம்

2. கேப்டன் பிரின்ஸ் - பரலோகப்பாதை பச்சை

3. இரும்புக்கை மாயாவி முழுநீளக்கதை

4. எஜன்ட் காரிகன் - சாத்தானின் தூதன் டாக்டர் செவன்

5. இரும்புக்கை மாயாவி முழுநீளக்கதை

புத்தகத்தின் அட்டைப்படங்கள்: (நன்றி விஜயன் சார்)

லயன் காமிக்ஸ் கம்பேக் ஸ்பெஷல் சிறப்பு வெளியீடு முகப்பு அட்டை	லயன் காமிக்ஸ் கம்பேக் ஸ்பெஷல் சிறப்பு வெளியீடு பின் அட்டை

இந்த வருடம் ஒரு மாதம் விடுமுறையில் வந்து இருப்பதால் காமிக்ஸ் நண்பர்கள் அனைவரையும் சென்னை புத்தக கண்காட்சியில் சந்திக்க ஆவல். குறிப்பாக அய்யம்பாளையம் அவர்களை.

வழமை போல உங்கள் கருத்துக்களை தெரிவியுங்கள்.

நன்றி. வணக்கம்.

500

2011-10-04T23:34:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள். என்ன இது? 300 படம் போல 500 என்று ஏதாவது காமிக்ஸ் வந்து இருக்கிறதா என்று நினைக்க வேண்டாம். தமிழில் காமிக்ஸ் படிக்க முடியாத சோகத்தில் இன்று சென்னை வந்து, இங்கு இருக்கும் புத்தக கடல்களில் மூழ்கி திளைத்தபோது காணப்பெற்ற ஒரு காமிக்ஸ் பற்றிய புத்தகத்தை பற்றிய பதிவே இது. புத்தகத்தை வாங்கி விட்டேன். கைவசம் ஸ்கான்னர் இல்லாத காரணத்தினால் வெறும் போட்டோக்களை மட்டுமே கொண்டுள்ளது இந்த பதிவு.

டெக்ஸ் வில்லர்: நம்முடைய மனம் கவர்ந்த கவ் பாய் ஹீரோ டெக்ஸ் வில்லர் இந்த புத்தகத்தில் இடம் பிடிக்க வில்லை என்றால் கண்டிப்பாக இந்த புத்தகத்தை நான் (கவுண்டமணி போல) அன்-செலக்ட் செய்து இருப்பேன். முதன்மையான ஐநூறு காமிக்ஸ் ஹீரோக்களில் டெக்ஸ் இல்லை என்றால் அந்த ஐநூறு ஹீரோக்களை செலக்ட் செய்தவருக்கு காமிக்ஸ் பற்றிய ஒரு முழுமையான புரிதல் இல்லை என்றே சொல்வேன். இதோ டெக்ஸ் வில்லரைப்பற்றிய இந்த புத்தக குறிப்புகள்:

டேஞ்சர் டையபாலிக்: இந்த ஹீரோ தமிழில் ஒரே ஒரு கதையில் மட்டுமே வந்து இருந்தாலும் அவர் உலக அளவில் (குறைந்த பட்சம் இத்தாலி/பிரான்ஸ்) மிகவும் பிரபலம். இவரது ஒரே ஒரு கதை தமிழில் வந்து உள்ளது என்பதை அறிந்த இந்த காமிக்ஸ் ஹீரோவின் வெறியர்கள் அந்த புத்தகத்தை வாங்க துடியாய் துடித்தனர். எங்கள் ஊரை (மதுரை) சேர்ந்த ஒரு காமிக்ஸ் விற்பனனர் (இவருக்கும் சூப்பர் ஸ்டார் ரஜினி நடித்த பாட்ஷா படத்திற்கும் எந்த சம்பந்தமும் இல்லை) இந்த விடயத்தை கேள்விப்பட்டு மற்ற புத்தக ரசிகர்களிடம் இருந்து இந்த டேஞ்சர் டையபாலிக் புத்தகத்தை மட்டும் நைசாக பேசி (புத்தக மாற்று எக்ஸ்சேஞ் மூலம்) பல பிரதிகளை சேகரித்து அவற்றை ஐம்பதாயிரம் ருபாய் வரை விற்றதாக தகவல். இது தவறாகவும் இருக்கலாம், ஏனென்றால் இந்த மதுரை விற்பன்னரின் வளர்ச்சி பிடிக்காத தமிழ் கடவுள் பெயர் கொண்ட மற்றொரு புத்தக விற்பன்னர் (இவர் இந்த பீல்டில் fruit தின்று seed போட்டவர்) என்னிடம் கூறிய தகவல் இது.

தமிழில் வந்த இந்த ஹீரோவை பற்றிய ஒரு சுவையான காமிக்ஸ் இல்லாத பதிவுக்கு இங்கே கிளிக் செய்யவும்: டேன்ஜர் டையபாலிக் - லயன் காமிக்ஸ் அறிமுகம் செய்து வைத்த அற்புத ஹீரோ

அடுத்த படியாக தமிழ் காமிக்ஸ் உலகின் பல ஹீரோக்களை பற்றி தகவல் அளித்துள்ளார் இந்த புத்தக ஆசிரியர். ஜேம்ஸ் பான்ட், மாடஸ்டி, கார்த், காரிகன், மாண்டிரிக் (அடங்கொய்யால, ராணி காமிக்ஸ் இதழில் அவர் பெயர் அப்படித்தான் வரும்) என்று பலரைப்பற்றிய தகவல் கொண்ட சிறந்ததொரு குறிப்பேடாக இந்த புத்தகம் அமைந்துள்ளது.

இந்த பதிவை இடுவதற்கு எதுவாக டையபாலிக் பற்றிய தகவல் இருக்கும் பக்கத்த்தில் தன்னுடைய கட்டை விரலை கொடுத்து புகைப்படம் எடுக்க ஏதுவாக இருந்த தமிழ் காமிக்ஸ் ரசிகர்களின் அணில் நண்பர் சுந்தர் அவர்களுக்கு நன்றி.

சென்னையில் லயன் காமிக்ஸ் கிடைக்கும் இடங்கள்

2011-03-21T22:38:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள். நீண்ட நெடுங்காலத்திற்கு முன்பு நானும் தமிழ் காமிக்ஸ் பற்றி பதிவெழுதிக்கொண்டு இருந்தேன். ஆனால் பணிச்சுமையும், இட மாற்றமும் சேர்ந்து என்னை கடந்த இரண்டு, மூன்று மாதங்களாக பதிவிடாமல் தடுத்தது. இதோ, நம்முடைய லயன் காமிக்ஸ், முத்து காமிக்ஸ் ஆசிரியர் போல நானும் புத்துணர்வு பெற்று திரும்பி விட்டேன். இனிமேல் அடிக்கடி பதிவுகளை இட முயல்கிறேன்.

இன்று காலையில் திரு முத்து விசிறி அவர்களின் பதிவினில் இந்த கமெண்ட்டை கண்டேன், மன வருத்தம் கொண்டேன், இந்த பதிவினை இடும் சபதம் பூண்டேன் (அட, விஜய டி.ராஜேந்தர் அவர்களை நேரில் சந்தித்ததில் இருந்து நமக்கும் இப்படி எல்லாம் ப்புளோவில் எதுகை மோனையாக வருகிறதே?). இதோ அந்த கமென்ட்: //சரியில்ல....... said...

பிரண்ட்ஸ்.... மே ஐ கம் இன்? வணக்கம் நண்பர்களே..... நான் காமிக்ஸ் ரசிகன் ஆன போதும், சென்னையிலேயே வசிக்கின்ற போதும்.., எனக்கு இன்னும் ரத்தப்படலம் கிடைத்திட்ட பாடில்லை..... என்னுடைய காமிக்ஸ் தாகத்தை மீண்டும் கெளப்பி விட்ட உங்க எல்லோருக்கும் கோடி நன்றிகள். வரும் வாரத்தில் கார் புக் செய்து சிவகாசி கிளம்பப்போகிறேன்....... சென்னை கடைகளில் மகா மட்டமான பத்தகங்கள் கிடைக்கின்றது... லயன் கிடைப்பதில்லையே என்ற வயித்தெரிச்சலை விஜயன் ஸாரிடம் சொல்லாம் என்று இருக்கிறேன்...( அவரை சந்திக்க முடிந்தால்...) பழைய புத்தகங்கள்...(கைவசம் உள்ள பிரதிகள்) அனைத்தையும் அள்ளிக்கொண்டு வரும் முடிவில் இர்க்கிறேன்.... மற்றும் எனது ப்ளாக்கில் காமிக்ஸ் பற்றிய ஒரு பதிவு இடப்போகிறேன்.... வேறு ஒரு நாட்டில் இருக்கும் ஒரு தமிழ் நண்பன் காமிக்ஸ் அனுபவத்தை தான் எழுதப்போகிறேன்... டைம் கெடைச்சா வாங்களேன்!!! நவ் பை பை!!!//

இப்படி பலரும் கேட்பதால் இனிமேல் லயன் காமிக்ஸ் கிடைக்கும் இடங்களை எல்லாம் புகைப்படம் எடுத்து அந்த விலாசங்களை இப்படி பதிவிட்டால் புதிய வாசகர்களுக்கு மகிழ்ச்சியாக இருக்குமே என்ற எண்ணத்தில் உருவாகியது தான் இந்த பதிவு.

சென்ற வாரத்தின் கடைசி இரண்டு நாட்கள் சென்னையில் ஒரு அலுவலகவேலை காரணமாக வந்து இருந்தேன் (அதாவது கிரிக்கெட் மேட்ச் பார்ப்பது). சென்னையில் பிரபலமாக இருக்கும் தி.நகரில் சென்னை சில்க்ஸ் பின் பக்கத்தில் இருக்கும் ஹோட்டல் தாஜ் கெமர் இன் ஹோட்டலில் தான் தங்கி இருந்தேன். அருமையான ஹோட்டல். அதன் அருகிலேயே ஒரு சப்பாத்திக்கடை வேறு. சொல்லவே வேண்டாம், அங்குதான் இரவினில் உணவு.

இரண்டு நாட்களுக்கு முன்பு நண்பரொருவரை சந்திக்க மயிலாப்பூர் சென்று இருந்தேன். அப்போது அவர் ஐஸ்க்ரீம் சாப்பிடலாம் வாங்க என்று லஸ் கார்னர் அருகில் இருந்த சங்கீதா ஹோட்டலின் முகப்பில் இருந்த ஐஸ் கிரீம் பார்லருக்கு அழைத்து சென்று கோன் ஐஸ் வாங்கி கொடுத்தார். அற்புதமான சுவையுடன் இருந்த அந்த ஐஸை சுவைத்துக்கொண்டே நடக்கையில் அருகில் இருந்த கடையில் அந்த அதிசயத்தை கண்டேன்.

லஸ் கார்னர் நேரு செய்தித்தாள் விற்பனையகம் - புத்தம் புதிய லயன் காமிக்ஸ் வெள்ளையாய் ஒரு வேதாளம் விற்பனைக்கு

லஸ் கார்னர் நேரு செய்தித்தாள் விற்பனையகம் - புத்தம் புதிய காமிக்ஸ் கிளாசிக்ஸ் களிமண் மனிதர்கள் - இரும்புக்கை மாயாவி சாகசம்

லஸ் கார்னர் - மயிலாப்பூர் - நேரு செய்தித்தாள் விற்பனையகம் - லஸ் கார்னர் சிக்னல் அருகில் - சங்கீதா ஹோட்டல் இருக்கும் வரிசையில்

இதைத்தவிர சென்னையில் இன்னும் சில இடங்களில் காமிக்ஸ் கிடைக்க கண்டேன். அவற்றை பற்றி விரைவினில் முழுவதுமாக புகைப்படங்களுடன் பதிவிடுகிறேன். அதுவரையில் சென்னையில் தமிழ் காமிக்ஸ் கிடைக்கும் சில இடங்களை பற்றிய விவரங்கள் இதோ:

1. Mylapore Tank தெப்பக்குளம் பெட்ரோல் பேங்க் அருகில் (ஸ்ரீகுமரன் எதிரில்) இருக்கும் புத்தகக்கடை.

2. Mount Raod Anand Theatre Bus Stop Pavement News Paper Shop ஆனந்த் தியேட்டர் பஸ் ஸ்டாப்பில் இருக்கும் நடைபாதை கடை.

3. T.Nagar Bus Depot. Krishnaveni Theatre Entrance Book Shop தி.நகர் பஸ் டிப்போ எதிரில் கிரிஷ்ணவேணி தியட்டர் வாசலில் இருக்கும் புத்தகக்கடை இங்கேதான் இப்போது லத்திகா என்ற குடும்ப படம் ஓடுகிறது.

4. Mambalam Railway Station Book Stall தி.நகர் மாம்பலம் ரெயில் நிலைய புத்தகக்கடை.

5. Koyambedu Bus Depot Book Stall கோயம்பேடு பஸ் நிறுத்த புத்தகக்கடை.

Chennai Distributor: இவை தவிர கடந்த ஐந்து ஆண்டுகளில் வந்த புத்தகங்களை சிவகாசி செல்லாமல் சென்னையிலேயே வாங்க:

Mr V.P. ரத்தினம் (Phone Number: 044-2495 0495)

No 12, நைனான் தெரு,

அபிராமபுரம்,

சென்னை 600018.

சென்னையில் இருந்த இரண்டு நாட்களில் கடுமையான பணிச்சுமை. ஆகையால் சக பதிவர்களை சந்திக்க இயலவில்லை. அதுவுமில்லாமல் இந்த பயணம் கடைசி நேர மாறுதலுக்குட்பட்டதாக இருந்த காரணத்தினால் முன்கூட்டியே திட்டமிட இயலவில்லை. அடுத்த மாதம் குட் பிரைடே அன்று நண்பர் ஒருவருக்கு சென்னையில் ஒரு முக்கிய வேலை இருப்பதால் அவருடன் நானும் வரவுள்ளேன். அப்போது சந்திக்கலாம் தோழர்களே.

வழமை போல உங்கள் கருத்துக்களை தெரிவியுங்கள்.

நன்றி. வணக்கம்.

டை ப்ளுதொஷே - இரத்தப்படலம் கதாசிரியரின் திரைப்படம்

2010-12-03T17:35:00.001+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

இரத்தப்படலம் கதையை படித்து முடித்துவிட்டு ஆவலுடன் அடுத்த புத்தகங்களை எதிர்பார்த்திருக்கும் வேளையில், இரத்தப்படலம் கதையை எழுதிய ஆசிரியர் ஷான் வான் ஹாமே அவர்களை பற்றி ஆசிரியர் விஜயன் சாரின் ஒரு சிறுகுறிப்பு: இதனை படித்துவிடுங்கள், பின்னர் பதிவை தொடருங்கள்.

இரத்தப்படலம் கதையை எழுதிய ஆசிரியர் ஷான் வான் ஹாமே அவர்களை பற்றி தீவிரமாக தேடி, அலசி ஆராயந்துக்கொண்டிருக்கையில், அவர் கதை எழுதி, அந்த கதை திரைப்படமாக தியேட்டரில் வெளிவந்துள்ளது என்பதைக்கேள்விப்பட்டவுடன், உடனடியாக இந்தப்பதிவினை இட்டுவிட்டேன்.

இந்த படமானது டை ப்ளுதோஷே என்ற ஷான் வான் ஹாமேவின் காமிக்ஸ் கதையை மைய்யமாக கொண்ட உருவாக்கப்பட்ட ஒன்றாகும். உண்மையில் இந்த காமிக்ஸ் கதை ஒரு சீரியஸ் ஆனா கதையாகும். ஆனால் இந்த சினிமா படமாக்கப்பட்ட விதத்தில் இருந்து இது ஒரு பிளாக் காமெடி என்பது தெள்ளத் தெளிவாக விளங்குகிறது. காமிக்ஸ் கதையில் பெண்ணின் தகப்பனார் ஆக வரும் அந்த நபரும் (ஹெர்மன் வால்சர் - திரைப்படத்தில் நடிகர் அர்மின் ரோடே) மற்றும் அந்த தலைமை சமையல்காரரும் (பிரான்ஸ் பெர்கர் - திரைப்படத்தில் நடிகர் உயே ஓஸ்சென்கேனேக்ட் ) இருவரும் மிகவும் சீரியஸ் ஆன கதாபாத்திரங்கள் ஆக வருபபவர்கள். அதுவும் நட்டத்தில் இயங்கும் அந்த ஹோட்டலை நடத்தி துன்பத்தில் இருக்கும் பிரான்ஸ் பெர்கரின் கதாபாத்திரம் ஒரு சிறப்புவாய்ந்த ஒன்றாக இருந்தாலும், அடிக்கடி கோபப்படும் பெண்ணின் தந்தையாக வரும் ஹெர்மன் வால்சர் பாத்திரம் தான் கதையின் மையம். அந்த பாத்திரத்தின் முன்கோபமே இந்த மொத்தக்கதைக்கும் காரணம்.

ஆம், மகளின் கல்யாண விழாவில் சமையல்காரர் சற்று மரியாதைக்குறைவாக நடந்து கொண்டார் என்று அவர் கோபித்துக்கொள்ள, அதன் விளைவாக நடக்கும், (சற்றும் நம்ம இயலாத) சம்பவங்களின் கோர்வையே இந்த நிமிடங்கள் ஓடும் ஜெர்மன் திரைப்படம். இந்த படம் ஆங்கிலத்தில் இன்னமும் மொழிமாற்றம் செய்யப்படவில்லை. இருந்தாலும் ஜெர்மனியில் இருந்து அந்த தலைப்பை ஆங்கில மொழியாக்கம் செய்தால் "பிளடி மேரேஜ்" என்று சொல்லாம்.

குறிப்பிட்டு சொல்வதானால் இரண்டு கர்வம் கொண்ட ஆண்களின் மோதல் என்று இந்த படத்தை சொல்லலாம். அதிலும் குறிப்பாக அந்த இறுதிக்காட்சியில் இருவரும் பேசாமல் முறைத்துக்கொள்ளும் காட்சியும், அதனை தொடரும் அந்த திக் திக் கிளைமேக்ஸும் சூப்பர்.

படத்தின் போஸ்டரே ஆயிரம் கதைகளை சொல்லும் விதத்தில் திறம்பட உருவாக்கப்பட்டு உள்ளது. கண்டு களியுங்கள்: அதுவும் பெக்கின்பா படங்களில் இருப்பதைவிட அதிகம் துப்பாக்கிகள் என்று சொல்லும் விததிலேயே நீங்கள் புரிந்து கொள்ளலாம்.

படத்தின் கிரெட்டிடுகளில் நம்ம ஷான் வான் ஹாமே அவர்களின் பெயரை கவனியுங்கள்:

இந்த காமிக்ஸ் கதைதான் இப்படி திரைப்படமாக மாறியது: (இதில் இருக்கும் அந்த ஹெர்மான் என்பவர்தான் நம்ம கேப்டன் பிரின்ஸ் கதைகளின் மூலம் நம்மை மகிழ்விப்பவர்):

படத்தின் மற்ற விவரங்கள்:

விக்கிபீடியா: http://de.wikipedia.org/wiki/Die_Bluthochzeit

IMDB லிங்க்: http://www.imdb.com/title/tt0382572/

போஸ்டர்: http://www.imdb.com/media/rm1826984704/tt0382572

Film டிரைலர்: http://www.imdb.com/video/screenplay/vi403178265/

வழமை போல உங்கள் கருத்துக்களை தெரிவியுங்கள்.

நன்றி. வணக்கம்.

லயன் காமிக்ஸ் ஜம்போ ஸ்பெஷல் - இரத்தப் படலம் முழு புத்தகமாக

2010-10-30T16:57:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

எப்போ வரும், எப்போ வரும் என்று பலரும் காத்திருந்த லயன் காமிக்ஸ் ஜம்போ ஸ்பெஷல்இதழ் ஒரு வழியாக வந்தே விட்டது. நேற்றே வந்திறங்கிய இந்த புத்தகங்களின் முதல் பக்கங்களை அனுப்பியமைக்கும், என்றும் அன்புடன் இருக்கும் நட்பிற்கும் திரு கிங் விஸ்வா அவர்களுக்கு நன்றி. தயவு செய்து தாமதிக்காமல் உடனடியாக வாங்கி விடுங்கள். பின்னர் தேடினாலும் கிடைக்காது.

இதோ, அந்த அட்டைப் படங்கள்:

வழக்கம் போல என்றுமே லயன் மற்றும் முத்து காமிக்ஸ் புத்தகங்களில் முதலில் படிப்பது ஆசிரியரின் ஹாட் லைன் தான். இதோ, அந்த பக்கங்கள். ஆம், வழகத்திற்கு மாறாக இந்த இதழில் இரண்டு பக்கங்கள் எழுதி உள்ளார் விஜயன் சார். சென்ற புத்தகமாகிய கொலை செய்ய விரும்பு ஹாட் லைனும் இரண்டு பக்கங்களே என்றாலும் அவை சிறிய வடிவமைப்பில் இருந்தவை.

இந்த புத்தகத்தின் பின்னால் இருந்த கடின உழைப்பை பற்றிய ஆசிரியரின் கருத்துக்கள் மற்றுமொரு ஹாட் லைனாக:

முதன்முறையாக இந்த கதாபாத்திரங்களை நம்முடைய மனக்கண் முன்னே உலாவ விட்ட கதையாசிரியர்களை பற்றி: மேலும், இந்த புத்தக தொடரில் பதிமூன்றாம் பாகமானது ஒரு வித்தியாசமான ஒன்றாகும். கிட்டத்தட்ட ஒரு கதை சுருக்கம் போல இருக்கும் (முந்தைய பனிரெண்டு இதழ்களுக்கும்). அந்த பதிமூன்றாம் பாகத்தை தனி இதழாக ஆசிரியர் வெளியிட இருப்பது மற்றுமொரு சிறப்பு.

அடுத்து வரப்போகும் எட்டு இதழ்களின் முன்னோட்டங்களை ஏற்கனவே கிங் விஸ்வாவின் இந்த பதிவில் பார்த்துவிட்டோம், இருந்தாலும் நெடுநாள் கழித்து லயன் காமிக்ஸில் எட்டு கதை விளம்பரங்கள்: பேக் டு பார்ம்?

இந்த ஏழு புத்தகங்களையும் முன்பதிவின் மூலம் வீடு தேடி வரச்செய்ய உடனடியாக இந்த முன்பதிவு கூப்பனை நிரப்பி அனுப்புங்கள்: மூன்று மாதத்தில் ஏழு புத்தகங்களும் வந்து சேரும்.

அடுத்தபடியாக, அனைவராலும் விரும்பி படிக்கப்படும் ஒரு தொடர்: சிங்கத்தின் சிறு வயதில் (பதினைந்தாம் பாகம்):

இந்த புத்தகத்தை பற்றிய முத்துவிசிரியின் முத்தான பதிவு இங்கே: http://muthufanblog.blogspot.com/2010/10/wait-is-over.html

அந்த பதிவின் மூலம் தெரியவரும் மற்றுமொரு முக்கியமான விஷயம்: தமிழ் காமிக்ஸ் உலகம் இணையதளத்தில் விரிவான, தெளிவான பதிவொன்று விரைவில் வரும்.

வழமை போல உங்கள் கருத்துக்களை தெரிவியுங்கள்.

நன்றி. வணக்கம்.

இரத்தப் படலம் காமிக்ஸ் புத்தகம் வெளியீடு

2010-06-10T14:54:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

தமிழ் காமிக்ஸ் உலகில் ஒரு தேக்க நிலை வந்துள்ளது என்னவோ மறுக்க இயலாத உண்மைதான். அதனை போக்க என்னவிதமான நடவடிக்கைகள் எடுக்கப்பட்டு வருகின்றன என்பது இருட்டில் உள்ள புத்தகம் போல இருக்கிறது. படிப்பதற்கு ஒரு வெளிச்சம் தேவை. இந்த நிலை எப்போது மாறும் என்ற ஒரு ஆயாசம் வந்துள்ளது மறுக்க முடியாத உண்மை. பார்க்கலாம், நிலைமை ஒரு நாள் மாறும் என்பது உறுதி, ஆனால் அது எவ்வளவு சீக்கிரம் என்பதுதான் கேள்வி.

ஆனால், சினிபுக் நிறுவனத்தினர் ஆங்கிலத்தில் சொன்னமாதிரி வெளியிட்டு விட்டனர். விலை ருபாய் நானூற்றி ஐம்பது (ஒரே ஒரு கதை மட்டும் - அதாவது முதல் பாகம் மட்டும் - முழு வண்ணத்தில்). உலக அளவில் விற்பனை சந்தை உள்ள வசதி, ஆங்கில புத்தகங்களுக்கு இந்தியாவில் உள்ள மோகம், இந்த கதையின் பிரம்மாண்டம், சமீபத்தில் படமாகவும் வந்த விளம்பர வசதி என்று பல காரணிகளை சொன்னாலும்கூட, தமிழில் படிக்கும் அந்த சுகம் இதில் இல்லைதான்.

இப்போதைக்கு முதல் இதழ் மட்டும்தான் வெளிவந்துள்ளது, மற்ற இரண்டு இதழ்களும் அடுத்த இரண்டு மாதங்களில் வந்துவிடுமாம். இதோ அந்த அட்டைகளின் அணிவகுப்பு.

இரத்தப் படலம் - பாகம் 1 அட்டை	இரத்தப் படலம் - பாகம் 2 அட்டை	இரத்தப் படலம் - பாகம் 3 அட்டை

இந்த புத்தகத்தின் சில சாம்பிள் பக்கங்களை அந்த நிறுவனத்தினரே கொடுத்துள்ளனர். பார்த்து ரசியுங்கள்.

இரத்தப் படலம் - ஆங்கிலத்தில் - முழு வண்ணத்தில் – பக்கம் 1	இரத்தப் படலம் - ஆங்கிலத்தில் - முழு வண்ணத்தில் - பக்கம் 2

இந்த கதை ஒரு மறக்க முடியாது சரித்திரம் ஆகும். பல தடவை படிக்கும்போதும் எனக்கு கண்ணில் நீர் வராத குறைதான், ஆம். அந்த அளவுக்கு ஒரு சிறந்த உணர்சிபூர்வமான கதை இது. இந்த கதையின் சில ஓவியங்கள் ஆன்லைனில் கிடைத்தன. உங்களிடம் பகிர்வதில் மகிழ்ச்சி.

நேற்று நம்முடைய சக தோழர் பயங்கரவாதி டாக்டர் செவன் அவர்களுக்கு பிறந்த நாள், தாமதமானாலும் கூட வாழ்த்து சொல்வதில் தவறில்லை. பல்லாண்டு வாழ வாழ்த்துக்கள் தோழர். அவருக்கு பிடித்த மேஜர் ஜோன்ஸ் அவர்களின் படமும் இந்த வரிசையில் இருப்பது அவருக்கு மகிழ்வை தரும் என்றே நம்புகிறேன்.

நண்பர் விஸ்வா கேள்வி பதில்களுக்கு என்று தனியாக ஒரு பகுதியை ஆரம்பித்துள்ளார். காமிக்ஸ் சம்பந்தமான அனைத்துக் கேள்வி பதில்களுக்கும் அங்கு விடை கிடைக்குமாம். சுட்டி இதோ: தமிழ் காமிக்ஸ் உலகம்.

அங்கு கேட்க வேண்டிய கேள்விதான், இருந்தாலும் இங்கேயே எழுப்புகிறேன் - இரத்தப் படலம் ஜம்போ ஸ்பெஷல் எப்போது வரும்?

நன்றி, வணக்கம்.

சிறப்பு பதிவு: லக்கிலுக்கின் ”மேற்கே ஒரு மாமன்னர்!”

2010-04-14T22:31:00.000+05:30

தமிழ் காமிக்ஸ் ரசிகர்களுக்கு விடுமுறை தின நல்வாழ்த்துக்கள். வழமை போல சமீப காலங்களில் பதிவிட இயலவில்லை. மன்னிக்கவும். அதனால் இன்று (இன்று மட்டுமே) ஒரு மீள்பதிவு. ரசிகர்கள் மன்னிக்க வேண்டுகிறேன். இனிமேல் இதுபோல தொடராது.

லயன் காமிக்ஸின் 202வது இதழாக முழுவண்ணத்தில் வெளிவந்திருக்கும் லேட்டஸ்ட் காமிக்ஸ் “மேற்கே ஒரு மன்னர்”. நிழலைவிட வேகமாக துப்பாக்கியை கையாளும் திறமை கொண்டவரான லக்கிலுக் ஒரு கோமாளிக்கூட்டத்திடம் மாட்டி படும் அவதைகள் வழக்கம்போல பெட்டிக்கு பெட்டி நகைச்சுவையாக அமைந்திருக்கிறது.

”தனிமையே என் துணைவன்” என்ற பாடலை கதையின் இறுதிக் கட்டத்தில் பாடுவது தான் லக்கிலுக்கின் வழக்கம். மாறாக இந்த கதையில் பாடலை பாடியவாறே அறிமுகமாகிறார். முன்பெல்லாம் செயின் ஸ்மோக்கராக இருந்த லக்கிலுக் சில ஆண்டுகளாக தம் அடிப்பதை விட்டு விட்டதால் கொஞ்சம் சுவாரஸ்யம் குறைகிறது.

கிராஸ் சிட்டியின் செல்வந்தர் ஒருவர் கொஞ்சம் மனநலம் பாதிக்கப்பட்டு தான் அமெரிக்காவின் மன்னர் என்று நினைத்துக் கொண்டு, அரண்மணை, இராணுவம், அமைச்சர்கள் இத்யாதிகளை தன் சொந்த செலவில் அமைத்து கும்மி அடித்துக் கொண்டிருக்கிறார். கிராஸ் சிட்டிக்கு வரும் லக்கிலுக் ஏதோ ஒரு அசந்தர்ப்பமான சூழ்நிலையில் அவருக்கு உதவிவிட உடனடியாக லக்கிலுக்கை தளபதி ஆக்கிவிடுகிறார்.

ஒரு மரியாதைக்காக அந்த மன்னரின் (?) அரண்மனைக்கு விசிட் அடிக்கும் லக்கிலுக்குக்கு அதிர்ச்சி. பைத்தியக்காரனாக இருந்தாலும் அந்த மன்னர் ஒரு இராணுவத்தையே நிஜமாக அமைத்திருப்பதை காணுகிறார். ஒரு பைத்தியக்காரன் கையில் அழிவு ஆயுதங்களோடு இராணுவம் இருப்பது ஆபத்தானது என்று ஊருக்குள் எச்சரிக்கிறார்.

யாரும் (ஷெரிப் உட்பட) லக்கிலுக்கின் எச்சரிக்கையை சீரியஸாக எடுக்கவில்லை. லக்கிலுக் பயந்தது போலவே ஒரு மொள்ளமாறி அந்த பைத்தியக்கார மன்னனுடன் சேர்ந்துவிட அவர்கள் வசம் இருக்கும் இராணுவம் கிராஸ் சிட்டியை கைப்பற்றி வங்கியை கொள்ளையடிக்கிறது. இந்த கூத்துகளுக்கெல்லாம் லக்கிலுக் எப்படி முடிவு கட்டுகிறார் என்பதை விலாநோக சிரிக்க வைத்து சொல்கிறார்கள்.

பத்து ரூபாய் விலையில் முழு வண்ணத்தில் வெளியாகியிருக்கும் “மேற்கே ஒரு மாமன்னர்” இப்போது கடைகளில் பரபரப்பாக விற்பனையாகிறது. இந்த இதழின் ஹாட்லைன் பகுதியில் லயன் காமிக்ஸ் ஆசிரியர் எஸ்.விஜயன் ஒரு விவகாரத்தை கோடிட்டுக் காட்டியிருக்கிறார். சினிமா படங்களுக்கு வீடியோ பைரசி வருவது போல இப்போது காமிக்ஸ்களும் சிடி வடிவில் திருடி விற்கப்படுகிறதாம். அது சம்பந்தமாக அவர் எழுதியிருப்பது கீழே!

“இரத்தப் படலம்” - தொடரும் ஒரு சோக காவியத்தை யாரும் மறந்திருக்க முடியாது. கமல் நடித்த “வெற்றி விழா” படத்துக்கே அந்த காமிக்ஸ் தொடர் தான் இன்ஸ்பிரேஷன் என்பார்கள். இருபது ஆண்டுகளுக்கும் மேலாக வந்து கொண்டிருக்கும் அத்தொடர் ஒரே புத்தகமாக (முழுமையான பதினெட்டு பாகங்களும் சேர்ந்து) ரூ. 200 விலையில் மிக விரைவில் வர இருக்கிறது. வில்லியம் வான்ஸ் என்ற ஓவியர் வரைந்த தத்ரூப சித்திரங்கள் இத்தொடரின் சிறப்பு. காமிக்ஸ் ரசிகர்களுக்கு செம ட்ரீட் இது. அதுகுறித்த விளம்பரங்கள் கீழே :

நண்பர் விஸ்வாவுக்கு பிறந்த நாள் நல்வாழ்த்துக்கள்.

லயன் காமிக்ஸ் 207 - கொலை செய்ய விரும்பு - விமர்சனம்

2009-11-15T17:43:00.002+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

நீண்ட நாட்கள் ஆகி விட்டது நாம் சந்தித்து. இந்த இடைப்பட்ட காலத்தில் சில நல்ல விஷயங்கள் நடந்து உள்ளன. நம்முடைய சக காமிக்ஸ் நண்பர் லவ்டேல் மேடி அவர்களுக்கு திருமணம் நிச்சயம் ஆகி உள்ளது. திருமணம் இந்த மாத இறுதியில் ஈரோட்டில் நடைபெற உள்ளது. நான் கலந்து கொள்ள உள்ளேன், சக காமிக்ஸ் நண்பர்களை சந்திக்கவும் இது ஒரு வாய்ப்பாக அமையுமே.

மேலும் நெடு நாள் காமிக்ஸ் வாசகர் ஹாஜா இஸ்மாயில் அவர்கள் ஒரு காமிக்ஸ் பிளாக் ஆரம்பித்து உள்ளார். இங்கே சென்று அதனை ரசிக்கவும். காமிக்ஸ் உலகின் முடி சூடா மன்னரைத்தான் காணோம். அவரை மின் அஞ்சல் மூலம் தொடர்பு கொள்ள நடந்த முயற்சிகள் பலனளிக்கவில்லை. நம்பத்தகுந்த வட்டாரத்தில் இருந்து கிடைத்த தகவலின்படி அவர் தன்னுடைய பணி நிமித்தமாக அயல் நாட்டில் செட்டில் ஆகிவிட்டாராம். எங்கிருந்தாலும் வாழ்க தலைவரே.

புத்தக விவரங்கள்

                                     தலைப்பு : SWEET CAROLINE

                                     எழதியவர் : பீட்டர் ஒ’டான்னல்

                                     ஓவியர் : நெவில் கால்வின்

                                     முதலில் வெளியானது : 29-11-1983 முதல் 19-04-1984 வரை (120 Strips)

                                     வெளியானது: EVENING STANDARD (5815-5914A)

                                     இந்தியாவில் : லயன் காமிக்ஸ்

                                     தமிழாக்கம் : S.விஜயன்

                                     வெளியீட்டு எண் # 207 தமிழ்

                                     தலைப்பு : கொலை செய்ய விரும்பு!

                                     முதலில் வெளியானது : நவம்பர் 06, 2009

வழமை போல புத்தகத்தில் மிகுந்த ரசிக்கத்தக்க பகுதி ஆசிரியரின் ஹாட் லைன் தான். இதோ, அந்த பக்கங்கள். ஆம், வழகத்திற்கு மாறாக இந்த இதழில் இரண்டு பக்கங்கள் எழுதி உள்ளார் விஜயன் சார்.

கதையின் முதல் இரண்டு பக்கங்கள் உங்கள் பார்வைக்கு:

கதை விமர்சனம்: வழமையான மாடஸ்டி கடைக்கான பிளாட் தான் இதிலும் உள்ளது. மாடஸ்டியும், வில்லியும் ஓய்வு எடுக்க அமைதியான இங்கிலாந்து கிராமபுரத்தில் இருக்கும்போது அவர்களின் நண்பர் ஒருவர் கொடூரமான முறையில் கொல்லப்படுகிறார், கிரிக்கெட் விளையாடிக் கொண்டு இருக்கும்போது.

விசாரணையில் இந்த கொலை ஒரு புதிய கூலிக் கும்பலின் வலிமையை பறைசாற்ற ஒரு விளம்பரம் என்று அறியும்போது நண்பர்கள் இருவரும் இந்த புதிய கும்பலை ஒழிக்க சபதம் மேற்கொள்கின்றனர். அந்த கும்பலை பற்றிய விவரங்களை அறிய ஒரு கிரிக்கெட் பந்துதான் மாடஸ்டிக்கு உதவுகிறது.

மேலும் தகவல் கொடுத்த நபரின் மனைவியை அந்த கும்பல் கடத்தி சென்று பிணையக்கைதியாக வைத்து இருக்கின்றனர். அப்போது மேஜர் டர்ரன்ட்டின் நண்பி ஒருவரும் இந்த கும்பலால் மிரட்டப் படுவதை அறிந்த மாடஸ்டி வலிய சென்று இந்த கும்பலின் இலக்கு ஆகிறாள். அதனால் எதிரிகளால் கைதாகிறாள் மாடஸ்டி.

வில்லி கார்வின் என்னவானார்?
மாடஸ்டி இருக்குமிடம் தெரிந்ததா?
மேஜர் டர்ரன்ட்டின் நண்பி கொலை மிரட்டலில் இருந்து தப்பித்தாரா?
பிணையக்கைதியை காப்பாற்ற முடிந்ததா?
அந்த புதிய கூலிக் கும்பல் யார்?

என்ற பல கேள்விகளுக்கு விடை அளிக்கும் வகையில் இந்த கதை சிறப்பாக அமைந்து உள்ளது. படிக்க தவறாதீர்கள். கதை பற்றி விரிவாக பின்பு பேசலாம். இதோ இந்த புத்தகத்தில் உள்ள மற்ற கதை விளம்பரங்கள்:

முடிவில் சிங்கத்தின் சிறு வயதை நாம் விட முடியாது அல்லவா? இதோ அந்த பக்கங்கள்:

//சாம்பியன்ஸ் கோப்பை பற்றி அனைவரும் ஆவலுடன் எதிர்பார்த்துக் கொண்டு இருக்கும் நேரத்தில் கிரிக்கெட் சார்ந்த ஒரு கதையை வெளியிட இருக்கும் நம்முடைய ஆசிரியரின் திறமையை பாராட்ட வார்த்தைகளே இல்லை. ஆமாம், இந்த கதையில் கிரிக்கெட் ஆட்டமும் ஒரு முக்கிய பங்கு வகிக்கிறது. குறிப்பாக வில்லி கார்வின் ஜாண்டி ரோட்ஸ் போல பீல்டிங் செய்வதை கவனியுங்கள்.//

என்று நம்முடைய முந்தைய பதிவில் எழுதி இருந்தோம். ஆனால், அதற்க்கு பின்னர் சாம்பியன்ஸ் கோப்பையும், ஆஸ்திரேலியா பயண தொடரும் முடிந்த நிலையிலேயே இந்த புத்தகம் வந்து உள்ளது. இருந்தாலும் நாளை இலங்கை அணியுடன் நடைபெற உள்ள டெஸ்ட் போட்டிகள் தொடங்கும் வேளையில் வந்து என்னுடைய மானத்தை காப்பாற்றி விட்டது இந்த புத்தகம். இதோ இந்த புத்தகத்தின் அட்டைப்பட மாதிரியும், ஆங்கில வடிவத்தின் முதல் பக்கத்தின் பிரதியும்.

வழமை போல உங்கள் கருத்துக்களை தெரிவியுங்கள், சந்திக்க விரும்பும் நண்பர்கள் ஈரோட்டிற்கு வரலாம்.

நன்றி. வணக்கம்.

பின் குறிப்பு: இந்த பதிவில் முதலில் உள்ள மாடஸ்டி படம் ஒரு அரிய படம் என்பதால் அதனை இங்கு அளித்து உள்ளேன். புகழ் பெற்ற ஓவியர் ஸ்டீபன் ரிச்சர்ட் போல்டேரோ என்ற ஓவியர் வரைந்த மாடஸ்டி அட்டைப்படம் இது. அவரைப்பற்றி மேலும் தெரிந்து கொள்ள இங்கு செல்லுங்கள்: பியர் ஏல்லி

முன்னோட்டம் 2:லயன் காமிக்ஸ் 207-கொலை செய்ய விரும்பு

2009-09-20T00:03:00.002+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

தமிழ் காமிக்ஸ் வரலாற்றிலேயே முதல் முறையாக அடுத்து வரப் போகும் ஒரு இதழுக்கு சரியாக பதிவிட்டது நம்முடைய வலைத்தளம் தான் (அந்த முதல் முன்னோட்டத்தை இங்கே கிளிக் செய்து படியுங்கள்). அதுவும் அடுத்து வரப் போகும் இதழின் அட்டைப் படத்துடன் (இந்த அட்டைப் படம் கூட லயன் காமிக்ஸ் அலுவலகத்தில் மட்டுமே உள்ளது). இந்த பதிவின் பெருமைகள் அனைத்தும் என்னுடைய நண்பர் ஒருவருக்கே சேரும். அவருக்கு உங்கள் அனைவரின் சார்பாகவும் நன்றிகள் தெரிவிக்கிறேன். நன்றி நண்பரே, உங்களை நான் என்றும் மறக்க மாட்டேன்.

சரி வெறுமனே அட்டைப் படங்களை மட்டும் போடாமல் வேறு சில தகவல்களையும் வழங்கலாம் என்று நினைத்ததால் இந்த பதிவு தொடர்கிறது. சென்ற இதழ் மாண்டவன் மீண்டானில் அடுத்த லயன் காமிக்ஸ் பற்றிய விளம்பரம் இப்படி ஆக வெளியாகி இருந்தது உங்களுக்கு நினைவிருக்கலாம்.

வழமை போல இந்த இதழையும் நாம் ஏற்கனவே படித்து விட்டதால் இதோ இந்த இதழின் சில உள் படங்களை விளம்பரம் போல மாற்றி அமைத்ததின் விளைவை பாருங்கள்.

என்ன நண்பர்களே, இந்த முன்னோட்டம் பிடித்து இருந்ததா? என்ன பிடிக்கவில்லையா? சரி, சரி, இதோ இந்த லயன் காமிக்ஸ் புத்தகத்தின் முழு படம்.

சாம்பியன்ஸ் கோப்பை பற்றி அனைவரும் ஆவலுடன் எதிர்பார்த்துக் கொண்டு இருக்கும் நேரத்தில் கிரிக்கெட் சார்ந்த ஒரு கதையை வெளியிட இருக்கும் நம்முடைய ஆசிரியரின் திறமையை பாராட்ட வார்த்தைகளே இல்லை. ஆமாம், இந்த கதையில் கிரிக்கெட் ஆட்டமும் ஒரு முக்கிய பங்கு வகிக்கிறது. குறிப்பாக வில்லி கார்வின் ஜாண்டி ரோட்ஸ் போல பீல்டிங் செய்வதை கவனியுங்கள்.

இந்த புத்தகம் இன்னும் ஓரிரு வாரங்களில் அனைவருக்கும் வந்து சேர்ந்து விடும். அப்போது இதனை பற்றிய முழுமையான விமர்சனத்தை பார்க்கலாம். வழமை போல இந்த புத்தகம் எனக்கு இன்னமும் கிடைக்கவில்லை என்று கூறுபவர்களுக்கு ஒரே பதில்: தயவு செய்து சந்தா தொகையை உடனே செலுத்துங்கள் என்பதுதான். அப்படி முடியாதவர்கள், இந்த பதிவை படியுங்கள்.

நன்றி, வணக்கம்.

அடுத்த பதிவு?

2009-09-12T14:50:00.003+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

இந்த புத்தகம் வெளிவந்தபோது அமோக வரவேற்ப்பை பெற்றது. தற்போதைய ரசிகர்களுக்கு இது அந்த அளவுக்கு பிடிக்காமல் கூட போகலாம். ஆனால் இது ஒரு கிளாசிக் என்பதில் சிறிதளவும் சந்தேகம் வேண்டாம்.

இந்த பதிவு ஒரு டீசர் தான். முழுமையான பதிவு அடுத்த வாரத்தில் வெளிவரும். அதற்குள் இந்த படத்தை பார்த்து இது எதைப் பற்றியது என்று கண்டுபிடிக்க முடிந்தால் கண்டுபிடியுங்கள் பார்க்கலாம்.

என்னை மாதிரி இருக்கும் சிலருக்கு இதோ சில குளு'க்கள்:

* இந்த புத்தகம் எண்பதுகளில் வந்தது.

* இந்த புத்தகத்தின் கர்த்தா தற்போது தமிழ் சினிமாவில் இருக்கிறார்.

* இந்த புத்தகம் கிடைக்காதா என்று இன்னமும் பலர் தேடி அலைகின்றனர். ரேர் புத்தகம்.

* இதன் கதை சிறைச்சாலையில் ஆரம்பித்து பிளாஷ்பேக்கில் சொல்லப்படும்.

விடைகளை கமெண்ட் மூலமும் தெரிவிக்கலாம்.

நன்றி வணக்கம்.

தமிழ் கிராபிக் நாவல் - மோட்சத்திற்கு அப்பால்

2009-09-04T15:03:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

நம்முடைய சென்ற பதிவாகிய சென்னையில் ஒரு காமிக்ஸ் காலம் நல்ல வரவேற்பை பெற்றுள்ளது குறித்து மகிழ்ச்சி. வாசகர்களில் பலரும் காமிக்ஸ் கிடைக்குமிடங்களை பற்றி தகவ தந்தது மகிழ்வை அளித்தது. இதைப் போலவே அனைத்து ரசிகர்களும் தங்களின் காமிக்ஸ் வாங்கும் கடைகளை தெரிவித்தால் அது புதிய மற்றும் பழைய வாசகர்களுக்கு பயனளிக்கும் என்பதை இங்கே நான் தெரிவித்துக் கொள்கிறேன்.

இந்த பதிவு ஒரு புதிய முயற்சியை பற்றிய பதிவாகும். தமிழ் காமிக்ஸ் வரலாற்றிலேயே இப்படி ஒரு முயற்சி நடந்தது இல்லை என்று இந்த புத்தகத்தின் பதிப்பாளர் கூறுகிறார். அதுவும் இல்லாமல் இந்தியாவிலேயே இதுதான் முதல் முயற்சி என்று வேறு அவர் கூறுகிறார். ஆம், நம்முடைய இந்த பதிவு தமிழின் முதல் கிராபிக் நாவலைப் பற்றியது.

ஆங்கில புத்தக உலகில், தற்போது பலரும் கிராபிக் நாவல், கிராபிக் நாவல் என்று கூறிக் கொண்டு ஒரு முழு காமிக்ஸ் கதையை நம் தலையில் கட்டி விடுகின்றனர். முறையாக இந்த கதைகள் இதழ்களில் வந்தால் விலை குறைவாக இருக்கும். ஆனால் அதனை பப்ளிகேஷனில் போட்டு கிராபிக் நாவல் என்று சொல்லி விலையை பல மடங்கு கூட்டி மிளகாய் அரைக்கின்றனர். சரி, சரி, இதனைப் பற்றி விரிவாக பின்னர் பார்ப்போம். இப்போது நம்முடைய தமிழ் கிராபிக் நாவலைப் பற்றிய பதிவுக்கு செல்வோம் வாருங்கள்.

மருத்துவர் எல். பிரகாஷ் அவர்களை பற்றி எல்லோருக்கும் நன்றாக தெரியும். சில வருடங்களுக்கு முன்பு அவர் பெயர் அடிபடாத ஊடகமே இல்லை. அப்படி ஒரு நிலைக்கு பின்னர் அவர் தற்போது சிறைச் சாலையில் இருந்தவாறே பல புத்தகங்களை எழுதி வருகிறார். அவரைப் பற்றி தற்போதைய நிலையில் நான் எது சொன்னாலும் உங்கள் காதுகளில் ஏறாது என்பதால் மூத்த பத்திரிக்கையாளரும், ஊடக உலகில் பெரிதும் மதிக்கப் படும் மிகச் சிலரில் ஒருவராகிய திரு அசோகன் அவர்கள் என்ன கூறுகிறார் என்பதை பார்ப்போம்.

இப்படியாக சிறுகதைகளும் நாவல்களும் எழுத ஆரம்பித்த பிரகாஷ் அவர்கள் எப்படி கிராபிக் நாவல் உலகில் நுழைந்தார் என்பதே ஒரு தனி கதை தான். அதனை நான் கூறுவதை விட, எடிட்டர் அசோகன் சாரே திறம்பட சுவைபட கூறுவதை படியுங்கள்.

இவ்வாறாக வேறு ஒருவர் மறுத்து விட்டதாலும், அதிகமாக காசு கேட்டதாலும் தான் மருத்துவர் பிரகாஷ் அவர்கள் தானே வரைய ஆரம்பித்தார். இவருடைய கதைகளுக்கு இவரே சித்திரங்கள் வரைவது நமக்கெல்லாம் ஆச்சர்யம் அளித்தாலும் பல காமிக்ஸ் ஜாம்பவான்கள் இப்படித்தான் என்பதை நாம் இங்கே நினைவு கூற வேண்டும்.

இந்த மோட்சத்திற்கு அப்பால் என்ற கிராபிக் நாவல் இருநூற்றி நாற்பது பக்கங்களை கொண்ட ஒரு முழு நாவல் ஆகும். இதோ அந்த நாவலின் முதன்மை பக்கங்கள்:

இந்த லதையை சொல்லி இதனை வாங்க விடாமல் தடுக்க எனக்கு மனமில்லை. ஆனால், ஒன்றே ஒன்று மட்டும் கூறிக் கொள்ள விரும்புகிறேன், இந்த தமிழ் கிராபிக் நாவல் ஒரு அற்புதமான சயன்ஸ் பிகஷன் கதையாகும். விண்வெளி கதைகளை விரும்பும் ரசிகர்கள் இதனை தயவு செய்து மிஸ் செய்ய வேண்டாம். கதையின் முக்கிய அம்சமே நாயகனின் துணையாக வரும் ஒரு உயிரினம் தான். அது என்ன என்பதை இங்கு யாராவது இந்த நாவலை வாங்கி விட்டு கூறினால் நான் மகிழ்வேன்.

உண்மையில் இந்த இடத்தில் முடியும் இந்த கதையில் நான் மிகவும் அதிர்ச்சி கொண்டேன். ஏனென்றால் கதாநாயகனின் உடன் இரு துண்டுகளாக வெட்டப் பட்டு அவன் மரணம் அடையும் நிலையில் இந்த கதை முடிகிறது. ஆனால் அதனை இப்படியே முடிக்காமல் டைரக்டர்ஸ் கட என்று ஆங்கில படங்களில் கூறுவதை போல தன்னுடைய கிரியேட்டர்ஸ் கட மூலமாக கதையை தொடர்கிறார் மருத்துவர் பிரகாஷ்.

இப்படியாக தொடர்ந்த கதை ஒரு வழியாக முடிகின்றது. உண்மையில் இதுவும் ஒரு சீரிஸ் போல தொடரும் என்றே தோன்றுகிறது. புத்தகத்தின் உள்ளே பிரகாஷ் அவர்கள் எழுதிய சில லேட்டஸ்ட் புத்தகங்களில் விளம்பரங்கள் இருப்பதை காணலாம். படங்களின் தரம் பற்றி பேசுபவர்களுக்காக இந்த புகைப் படங்கள்: சமீபத்தில் நான் கண்ட ஒரு ஆங்கில கிராபிக் நாவலின் அட்டைப் படம்,உள் பக்க படங்கள் மற்றும் அதன் விலை. இப்போது இந்த படங்களையும் நம்முடைய தமிழ் கிராபிக் நாவலின் படங்களின் தரத்தையும் கனிப்ப்புங்கள். பின்னர் விலையை சற்று பாருங்கள். (புகைப் படங்களை கிளிக் செய்தால் படம் பெரிதாக திறக்கும்).

தமிழகத்தின் அனைத்து முன்னணி புத்தக கடைகளிலும் கிடைக்கும் இந்த புத்தகங்களை சற்றே வாங்கி படித்து பாருங்களேன் தோழர்களே. இப்படி பட்ட முயற்சிகளை நம்மைப் போன்ற காமிக்ஸ் ரசிகர்கள் ஊக்குவிக்காவிட்டால் வேறு யார்தான் செய்வார்கள்?

சென்னையில் ஒரு காமிக்ஸ் காலம்

2009-08-25T22:20:00.001+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

நம்முடைய ரசிகர்கள் அடிக்கடி நம்மிடம் லயன் காமிக்ஸ் எங்கு கிடைக்கும்?, முத்து காமிக்ஸ் எங்கு கிடைக்கின்றது? காமிக்ஸ் கிளாசிக்ஸ் வந்து விட்டதா? என்று கேட்டுக் கொண்டே இருப்பதால் இந்த பதிவு இடப் படுகிறது.

சிவகாசியில் உள்ள லயன் காமிக்ஸ் ஆபீசுக்கு செல்ல முடியாதவர்கள் சென்னையில் கீழ்க் கண்ட முகவரிக்கு சென்றால் அவர்களுக்கு சமீபத்திய லயன், முத்து மற்றும் காமிக்ஸ் கிளாசிக்ஸ் இதழ்கள் கிடைக்கும்:

ரம்யா ஏஜன்சி,

எண் பனிரெண்டு,

நைனான் தெரு, அபிராமபுரம், சென்னை - 18.

தொலைபேசி எண்: 044 – 2495 0495.

இதை தவிர மாம்பலம் ரயில் நிலையத்தில் உள்ள மாருதி புத்தக நிலையத்திலும் அந்த மாதத்து காமிக்ஸ் இதழ்கள் கிடைக்கும். சென்ற வாரம் நண்பர் மாரியப்பன் அவர்களின் வேண்டுகோளுக்கு இணங்கி இந்த விவரங்களை தெரிவித்தது இருந்தேன்.

பின்னர் நானே அங்கு செல்லும் சந்தப்பம் நேரிட்டது. உடனே என்னுடைய கைபேசியில் இருந்த . கேமரா மூலம் அந்த புத்தக கடையை சில படங்கள் எடுத்து விட்டேன். ஒவ்வொரு இதழிலும் பத்து, பத்து புத்தகங்களை வரவழைககிறார்கலாம். லயன் காமிக்ஸ் தீர்ந்து விட்டதாம். காமிக்ஸ் கிளாசிக்ஸ் இன்னமும் இரண்டு காபி உள்ளது (மடக்காமல் இருக்கும் இதழ் என்பதால் நானும் இன்னும் ஒன்று வாங்கி விட்டேன்). முத்து காமிக்ஸ் நேற்று தான் வந்தது. மூன்று விற்று விட்டது. இந்த கடையில் நமது காமிக்ஸ் இதழ்களை நல்ல முறையில் டிஸ்பிளே செய்து உள்ளார்கள்.

வாசக அன்பர்களே, நீங்களும் உங்களுக்கு தெரிந்த காமிக்ஸ் விற்பனை கடைகளை உங்களின் பின்னூட்டம் மூலம் தெரிவித்தால் மற்ற நண்பர்கள் பயன் பெறுவார்கள்.

முத்து காமிக்ஸ் இதழ் எண் 312 - நிழல் எது? நிஜம் எது? - மந்திரவாதி மாண்டிரேக் சாகசம்

2009-08-06T15:58:00.002+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

நம்முடைய சென்ற பதிவாகிய முன்னோட்டம் நல்ல வரவேற்பை பெற்றுள்ளது குறித்து மகிழ்ச்சி. சென்ற பதிவை போலவே ஒவ்வொரு பதிவும் சிரத்தையுடன் செய்வேன் என்று உங்களுக்கு நான் உறுதி அளிப்பதோடில்லாமல் இதோ முன்னோட்டத்தை நிஜமாக்கும் பதிவு இடப்படுகிறது. ஆம், புத்தகம் வந்து விட்டது. சமீப கால வழமை போல வலையுலகில் இதனையும் நாம் தான் முதன்முதலில் இடுகிறோம். உதவி செய்யும் நண்பர்களுக்கு கோடானு கோடி நன்றிகள்.

அட்டைப் படம் சமீபத்திய டெம்பிளேட்டை கொண்டு உள்ளது மகிழ்வை அளிக்கிறது. சிறப்பாகவும் உள்ளது. மாண்டிரெக்'கின் குளோஸ் அப அட்டைப் படம் நன்றாகவே உள்ளது என்பது என்னுடைய கருத்து. உங்கள் கருத்தையும் அறிய ஆவலாக உள்ளேன்.

நம்முடைய காமிக்ஸ் எடிட்டர் திரு s.விஜயன் அவர்கள் தன்னுடைய காமிக்ஸ் டைம் பகுத்தியில் கூறி உள்ள விடயங்கள் மனதிற்கு மகிழ்வை அளிக்கின்றன. உதாரணமாக அடுத்த வெளியீடு, விரைவில் வரப் போகும் கதைகள் குறித்த விளம்பரங்களும் தகவலும் ஆவலை தூண்டும் விதத்தில் அமைந்து உள்ளன. அதிலும் குறிப்பாக நம்முடைய சென்ற பதிவில் குறிப்பிட்டது போல இந்த கதை தொண்ணுருகளின் ஆரம்பத்தில் விளம்பரப் படுத்தப் பட்டதை கூட அவர் கூறி உள்ளார்.

இதோ அந்த பழைய விளம்பரம்:

இந்த கதை ஒரு அற்புதமான கதை. சிலருக்கு இது பிடிக்காமல் போகலாம். ஆனால் கண்ணாடிகளுக்கு பின்னாலும் ஒரு உலகம் இருக்கக் கூடும் என்பதே ஒரு பேண்டசி தான். அதிலும் அங்கிருப்பவர்கள் நம்முடைய குணாதிசயங்களுக்கு நேர் மாறாக இருப்பார்கள் என்பதை நினைத்தால் ஒரு விடயம் தோன்றுகிறது - அங்கிருக்கும் அரசியல்வாதிகள் நல்லவர்களாக இருப்பார்கள்.

இந்த கதை கூட ஒரு வகையில் ஒரு தொடர்தான். ஆம், மாண்டிரெக் கதைகளில் வரும் எத்தர் கும்பல் எட்டு, லூசிபார் என்ற நாகம்/காலன் போல இந்த கதை வரிசையும் தொடரும். அதனால் தான் கதையின் முடிவில் ஆங்கில படங்களில் வருவதைப் போல அடுத்த கதைக்கு இப்போதே ஒரு ஹின்ட் கொடுத்து இருப்பார்கள்.

விங் கமாண்டர் ஜார்ஜ் மறுபடியும் சாகசம் செய்ய வருகிறார். கடந்த முறை போல இல்லாமல் இந்த முறை அவரது சாகசம் வந்தது ஐம்பதுகளில் அல்ல. அறுபதுகளின் முடிவில். ஆம், அடுத்து வரப் போவது ஒரு கிளாசிக் டெய்லி ஸ்டிரிப் கதை ஆகும். மறவாமல் படியுங்கள் முத்து காமிக்ஸ். சென்ற ஆண்டு அவரது கதை வந்தது உங்களில் பலருக்கு நினைவிருக்கலாம்.

அதற்க்கு அடுத்த இதழ் நம்முடைய மனம் கவர்ந்த ரிபோர்டர் ஜானி கதை ஆகும். நெடு நாட்களுக்கு பின்னர் ரிபோர்டர் ஜானி திரும்ப வருகிறார். அவருடைய இந்த கதையை நான் படித்து இருக்கிறேன். அதனால் சொல்கிறேன் - இது சமீப கால ஜானி கதைகளில் ஒரு டாப் கதையாக இருக்கும்.

முன்பே நம்முடைய பதிவில் கூறி இருந்தது போல பல பழைய கதாநாயகர்களை திரும்பவும் கொணர ஆசிரியர் முயல்கிறார். அதன் ஒரு பிரதி பிம்பமாக எண்பதுகளில் நம்முடைய மனதை கொள்ளை கொண்ட கதாநாயகன் ரோபோட் ஆர்சியின் சிறுகதை ஒன்று.இந்த கதை ஐம்பத்தி ஆறில் வந்த லயன் இதழின் ஆண்டு மலரில் வந்த கதை ஆகும்.

வழமை போல ரத்தப் படலம் ஜம்போ ஸ்பெஷல் இதழின் விளம்பரமும் முன் பதிவு கூப்பனும் இந்த இதழிலும் உள்ளன. இதோ அவை:

அடுத்து வரப் போகும் காமிக்ஸ் கிளாசிக்ஸ் இதழின் விளம்பரம் பின் அட்டையை அலங்கரிப்பதை பாருங்கள். உங்கள் காதை அருகில் கொண்டு வாருங்கள். ஒரு ரகசியம் சொல்கிறேன். வெகு விரைவில் இதனை பற்றிய ஒரு முன்னோட்டப் பதிவினை உங்கள் அபிமான இந்த காமிக்ஸ் வலைப் பூவில் நீங்கள் படிக்கலாம்.

இந்த புத்தகம் கடையில் கிடைக்க வில்லை, எங்கே கிடைக்கிறது என்று விசனப் படாமல் நம்முடைய காமிக்ஸ் புத்தகங்களுக்கு சந்தா கட்டி விடுங்கள். சந்தா கட்டாமல் இருக்க சிலர் கூறும் நொண்டி சாக்கு என்னவென்றால் புத்தகங்கள் ஒரு ஆண்டில் சரியாக வருவதில்லை என்பதே. நண்பர்களே, இந்த சந்தா என்பது ஆண்டு கணக்கில் வராது. புத்தக கணக்கில் வரும்., அதாவது பனிரெண்டு புத்தகங்கள் என்று கணக்கிட்டால் அந்த பனிரெண்டு புத்தகங்கள் தீரும் வரை (ஒரு ஆண்டோ, இரண்டு ஆண்டுகளோ) உங்களுக்கு புத்தகங்கள் வரும். ஆகையால் தயவு செய்து சந்தா கட்டிவிடுங்கள். நீங்கள் தொடர்பு கொள்ள வேண்டிய தொலைபேசி எண்: 04562 – 262749.

விரைவில், வெகு விரைவில் இந்த கதையின் ஆங்கில பதிப்பு மற்றும் வண்ணத்தில் ரீபிரிண்ட் வடிவத்துடன் வந்த புத்தகங்களை பற்றிய பதிவின் மூலம் உங்களை சந்திக்கிறேன்.

உங்கள் ஆதரவை நாடும் - ஜாலி ஜம்ம்பர்.

முன்னோட்டம் 1: முத்து காமிக்ஸ் இதழ் எண் 312 - நிழல் எது? நிஜம் எது? Preview

2009-07-24T00:22:00.000+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

கடைசியாக முத்து காமிக்ஸ் இந்த ஆண்டு பிப்ரவரி மாதம் வெளிவந்தது. இப்போது சரியாக ஐந்து மாதங்கள் கழித்து அடுத்த இதழ் வெளிவர இருக்கிறது. அடுத்து வரப் போகும் முத்து காமிக்ஸ் பற்றிய முன்னோட்ட பதிவு இது.

தமிழ் காமிக்ஸ் வரலாற்றிலேயே முதல் முறையாக அடுத்து வரப் போகும் ஒரு இதழுக்கு சரியாக பதிவிட்டது நம்முடைய வலைத்தளம் தான். அதுவும் அடுத்து வரப் போகும் இதழின் அட்டைப் படத்துடன் (இந்த அட்டைப் படம் லயன் காமிக்ஸ் அலுவலகத்தில் மட்டுமே உள்ளது). இந்த பதிவின் பெருமைகள் அனைத்தும் என்னுடைய நண்பர் ஒருவருக்கே சேரும். அவருக்கு உங்கள் அனைவரின் சார்பாகவும் நன்றிகள் தெரிவிக்கிறேன். நன்றி நண்பரே, உங்களை நான் என்றும் மறக்க மாட்டேன்.

இந்த கதை சரியாக நாற்பத்தி ஐந்து ஆண்டுகளுக்கு முன்பு ஆங்கிலத்தில் வெளிவந்தது. இதனுடைய ஆங்கில மூலம் உலகில் மிகச் சிலரிடம் மட்டுமே உள்ளது என்பது குறிப்பிட தக்கது. குறிப்பாக ஆன் லைனில் இந்த புத்தகம் கிடைப்பது இல்லை. ஆனாலும் இந்த புத்தகம் நண்பர் ஒருவரிடம் இருப்பதால் இந்த புத்தகம் வெளிவந்த உடனே இதனைப் பற்றிய பதிவை நாம் வெளியிடலாம். என்ன சரிதானே?

முத்து காமிக்ஸ் இதழ் எண் 312 - நிழல் எது? நிஜம் எது? - மந்திரவாதி மாண்டிரேக் சாகசம்

இந்த இதழை பற்றி சென்ற முத்து காமிக்ஸ் புத்தகத்தில் வந்த விளம்பரம் இதோ (இந்த கதை ஏற்கனவே பதினெட்டு வருடங்களுக்கு முன்பு விளம்பரம் செய்யப் பட்டது என்பது குறிப்பிடத் தக்கது):

முத்து காமிக்ஸ் இதழ் எண் 311ல் வந்த விளம்பரம் - நிழல் எது? நிஜம் எது? - மந்திரவாதி மாண்டிரேக் சாகசம்

சென்ற பதிவாகிய காமிக்ஸ் கிளாசிக்ஸ் மக்களிடம் சிறப்பான வரவேற்ப்பை பெற்றதை கண்டு உள்ளம் மகிழ்ந்தேன். அதனை இன்னும் படிக்காத ரசிகர்களுக்கு இதோ ஒரு மீள்-விளம்பரம்:

அந்த பதிவை படிக்க இந்த அட்டைப் படத்தை கிளிக் செய்தாலே போதும். அருமையான இந்த கதை சரியாக இருபத்தி நான்கு வருடங்களுக்கு முன்பு வந்த ஒரு காணக் கிடைக்காத பொக்கிஷம். இந்த கதை இப்போது உங்களுக்கு உலக அளவில் கிடைக்கும் ஒரே இடம் சிவகாசி தான். உலகில் அனைத்து மொழிகளிலும் மிகவும் அரிதான புத்தகம் இது.

நீங்கள் தொடர்பு கொள்ள வேண்டிய தொலைபேசி எண்: 04562 – 262749.

உங்கள் ஆதரவை நாடும் - ஜாலி ஜம்ம்பர்.

காமிக்ஸ் கிளாசிக்ஸ் 24 - விண்வெளிக் கொள்ளையர் - இரும்புக்கை மாயாவி

2009-07-21T10:34:00.002+05:30

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

இடைப் பட்ட காலத்தில் என்னவெல்லாமோ நடந்து விட்டது. இனிமேல் அதனைப் பற்றி பேசி பயனில்லை என்பதால், அதனை ஒரு துன்பியல் நிகழ்வாக மறந்து விடுவோம்.

இதோ என்னுடைய அடுத்த பதிவு: புத்தம் புதிய காமிக்ஸ் கிளாசிக்ஸ். என்னுடைய அன்பு நண்பர் ஒருவருன் உதவியால் இந்த பதிவை இட முடிகிறது. அவருக்கு என்னுடைய நன்றி. இந்த பதிவை படிக்கும் முன் பயங்கரவாதி டாக்டர் செவன் அவர்களின் முழு நீள விமரிசனத்தை படிக்குமாறு கேட்டுக் கொள்கிறேன். அந்த பதிவுக்கான சுட்டி இதோ: விண்வெளிக் கொள்ளையர்

இந்த புதிய காமிக்ஸ் கிளாசிக்ஸ் மூலம் நம்முடைய மனம் கவர்ந்த பிரகாஷ் பப்ளிஷர்ஸ் பத்திப்பகத்தினர் பழைய நினைவுகளுக்கு புத்துயிர் கொடுக்கும் முயற்சியில் ஈடுபட்டு உள்ளதில் உணரலாம். அதாவது, பழைய கதைகளை அதே வடிவத்தில் அளிப்பதின் மூலம் அந்த பழைய நினைவுகளை மலர செய்கின்றனர். அவர்களுக்கு நம்முடைய நன்றிகள். நல்ல விடயம் என்னவெனில் அடுத்த இதழும் இரும்புக் கை மாயாவியின் கதை தான். ஆம், களிமண் மனிதர்கள் என்ற கதைதான் அடுத்த காமிக்ஸ் கிளாசிக்ஸ் இதழ் எண் 25.

காமிக்ஸ் கிளாசிக்ஸ் எண் 25- இரும்புக்கை மாயாவி- விண்வெளிக் கொள்ளையர்-முன் அட்டை	காமிக்ஸ் கிளாசிக்ஸ் எண் 25- இரும்புக்கை மாயாவி- விண்வெளிக் கொள்ளையர்-பின் அட்டை

கண்ணை கவரும் அட்டைப் படம். ஆனால், பின் அட்டையை முன் அட்டையாக மாற்றி அமைத்து இருந்தால் மிகவும் நன்றாக இருந்து இருக்கும். ஏனெனில் இந்த இரண்டு அட்டைகளில் நன்றாக இருப்பது பின் அட்டையே என்பது என்னுடைய கருத்து. உங்களின் எண்ணங்களை பின்னுட்டத்தின் மூலம் தெரிவித்ததால் மகிழ்வேன்.

ஒரு சிறிய கேள்வி: இந்த இதழின் முன் அட்டை ஏற்கனவே நமது நெடுநாள் காமிக்ஸ் ரசிகர்களுக்கு பரிச்சயமான ஒன்று. அதனால் இந்த இதழின் அட்டை எதனுடன் சம்பந்தப் பட்டது என்று வாசகர்கள் கூறுவீர்களா? அல்லது நான் தான் முடிவில் தெரிவிக்க வேண்டுமா?

இந்த கதையை பற்றி திரு கிங் விஸ்வா அவர்களின் கருத்து இதோ: இரும்புக் கை மாயாவியின் "சூப்பர் ஹீரோ" கால கட்டத்தில் நான் படித்த முதல் கதை இதுவே. அந்த உதிரும் நோய் பற்றி பல காலம் நான் வியந்தது உண்டு.

X-டோல் உபயோகப் படுத்தும் படிக கதிர் துப்பாக்கி, மல்டிமேன் உதவிக்காக வரும் கிராவா கதிர்கள், டார்கத் வரும் ஹோவர் டிஸ்க், உறைய செய்யும் க்ரிஸ்டளிசர் கதிர்கள், பொருட்களை பெரிதாக்கும் கொலஸ்ஸா கதிர்கள், எதிரிகளை அழிக்க அரசாங்கம் உபயோகிக்கும் ட்ரகடான் குண்டு, மாயாவியை குணமாக்கும் நியுக்ளியர் நர்ஸ், கம்மா-ட்ரான் மின் இணைப்பின் மூலம் உருவாகும் வீரிய சைத்தான், அதை அழிக்க நிழல் படை பயன்படுத்திய ட்ரேசர் குண்டு, நிழல் படையின் வோல்டா துப்பாக்கி, ராட்சஸ உருவம் பெற்ற டார்கத் என்று பல ஃபாண்டஸி நிறைந்த கதை இது.

பலருக்கு இந்த கதை பிடிக்காமல் போகலாம். ஆனால் எனக்கு மிகவும் பிடித்த கதைகளில் இதுவும் ஒன்று. இந்த கருத்தில் எனக்கு எப்போதும் எந்த மாற்றமும் இருக்க போவதில்லை.

இந்த கதையை பற்றி ஏற்கனவே நம்முடைய பயங்கரவாதி தலைவர் அலசி ஆராய்ந்து விட்டதால் நான் அதிகமாக எதுவும் சொல்லப் போவது இல்லை. முதல் பக்கத்தையும் கடைசி பக்கத்தையும் பாருங்கள்.

விண்வெளிக் கொள்ளையர்-முதல் பக்கம்	விண்வெளிக் கொள்ளையர்-கடைசி பக்கம்

சமீபத்தில் ஆசிரியர் திரு எஸ் விஜயன் அவர்கள் மறுபடியும் பழைய பாணியில் இதழ்களை வெளியிடப் போவதாக கூறி இருந்தார். அதாவது நிறைய விளம்பரங்கள் (வரப் போகும் கதைகள், நாயகர்கள், சிறப்பிதழ்கள்), சிறு சிறு கதைகள் (விச்சு, கிச்சு, குண்டன் பில்லி, பரட்டை தலை ராஜா), புதிய பகுதிகள் (வாசகர் ஹாட் லைன்) என்று மீண்டும் லயன் காமிக்ஸ், முத்து காமிக்ஸ் இதழ்களில் வரும் என்று கூறி இருந்தார்.

அதனை நிறைவேற்றும் விதத்தில் இதோ இந்த காமிக்ஸ் கிளாசிக்ஸ் இதில் நம் மனம் கவர்ந்த இரண்டு விச்சு கிச்சு சிறுகதைகள்.

உங்கள் அபிமான விச்சு கிச்சு சாகசம் 1	உங்கள் அபிமான விச்சு கிச்சு சாகசம் 2

ஏற்கனவே கூறியது போல அடுத்த இதழ் இரும்புக் கை மாயாவியின் கதை தான். இது வரை அதிகள் கேள்விப் படாத ஒரு கதை. ஆம், இந்த கதை இதுவரை ஒரே ஒரு முறை தான் வந்து உள்ளது. அதுவும் இருபத்தி ஐந்து வருடங்களுக்கு முன்பு. அதனால் இந்த கதையை மறு பதிப்பு செய்யும் ஆசிரியருக்கு ஒரு ஜே.

வழமை போல இந்த புத்தகத்திலும் ஜம்போ ஸ்பெஷல் இதழின் விளம்பரம் உள்ளது. முதன் முதலில் பதிவு செய்து நூறு பெயர்களின் பட்டியல் இந்த லயன் காமிக்ஸ் இதில் வெளியிடப் பட்டு உள்ளது (அடியேனும் முதலில் செய்ததால் நம்முடைய பெயரும் ஐக்கியம்).பிறகு பதிவு செய்தவர்களின் பெயர்கள் விரைவில் வெளியிடப் படும்.

இது வரை பதிவு செய்தவர்களின் எண்ணிக்கை ஐநூறைக் கூட தொடவில்லை என்பது மனம் வருந்தக் கூடிய ஒரு செய்தி. என்ன செய்வது? நம்முடைய வாசகர்களும் அப்படித்தான் இருக்கிறார்கள். ஏதாவது ஒரு மொக்கை படத்தை பார்க்க சென்றாலோ, அல்லது ஹோட்டலில் சாப்பிட்டாலோ ஆகும் செலவான ருபாய் இருநூறை இதற்க்கு செலவழிக்க மறுக்கிறார்கள்.

இந்த பதினெட்டு புத்தகங்களை நீங்கள் ஒரிஜினல் புத்தகமாக வாங்கினால் அதற்க்கு ஆகும் செலவு என்ன தெரியுமா? 360 அமெரிக்க டாலர்கள். அதாவது கிட்டத்தட்ட பதினெட்டாயிரம் ருபாய், இந்திய மதிப்பில். நம்முடைய ஆசிரியர் அவர்கள் இப்படி பாடுபட்டு கொண்டு வரும் இந்த புத்தகத்தை யாரும் கண்டுக் கொல்லாமல் இருப்பது உண்மையில் வருத்தம் அளிக்கிறது.

ஒரு விடயம்: இந்த காமிக்ஸ் களஞ்சியமே இதுவரை இந்தியாவில் வந்த மிகப் பெரிய காமிக்ஸ் கதையாகும். இதுவே ஒரு சாதனை. அதனால், அந்த சாதனையாளர்கள் பட்டியலில் இடம்பெற முதலில் அந்த புத்தகத்தை முன்பதிவு செய்யுங்கள்.

அடுத்த கிளாசிக்ஸ் களிமண் மனிதர்கள்	ஜம்போ ஸ்பெஷல் விளம்பரம்

இந்த கதை ஆங்கிலத்தில் Valiant இதழில் வந்தது. அந்த இதழின் ஒரே ஒரு பிரதி மட்டுமே இப்போது கிடைக்கிறது. அந்த ஒரு பிரதியில் வந்த இரண்டு பக்கங்களை பாருங்கள்.

Valiant 1967_09_02_20	Valiant 1967_09_02_21

ஆங்கிலத்தில் இந்த கதை முப்பது வாரங்களில் அறுபது பக்கங்களாக வந்தது என்பதால் இந்த கிளாசிக்ஸ் கதையின் பக்கங்களை கவன்த்தேன். பார்த்தால் வெறும் ஐம்பத்தி ஆறு பக்கங்கள் மட்டுமே. என்னடா இது என்று யோசித்ததில், இது தொடர் கதையாக வந்த காலத்தில் முன்கதை சுருக்கம் மற்றும் தலைப்பு என்று ஒவ்வொரு எபிசொடிலும் இரண்டு பேணலை முழுங்கியதால் கடைசியில் இரண்டு பக்கங்கள் குறைந்த மர்மம் புலப்பட்டது.

விரைவில் மற்றுமொரு பதிவின் மூலம் உங்களை சந்திக்கிறேன்.

கண்ணாடி அணிந்த காமிக்ஸ் ஹீரோ : ரிப் கிர்பி

2009-06-13T20:48:00.000+05:30

தமிழ் காமிக்ஸ் ரசிகர்களுக்கு ஜாலி ஜம்ம்பரின் வணக்கம்.

காமிக்ஸ் ஹீரோ என்றாலே அவர் சில வகைகளில் அடங்கி விடுவார்:

சூப்பர் ஹீரோ (ஸ்பைடர், ஆர்ச்சி. இரும்புக் கை மாயாவி)

உளவாளிகள் (ஜேம்ஸ் பாண்ட், மாடஸ்டி, ஜானி நீரோ, லாரன்ஸ் டேவிட்)

அநீதிகளை எதிர்த்து போராடுபவர் (டெக்ஸ் வில்லர், மற்ற கௌபாய்கள், ஜான் சில்வர்)

அதைப் போலவே ஹீரோ என்றால் அவர் அசாதாரண மன வலிமையும், உடல் வலிமையும் பெற்று தோற்றத்திலேயே பலரை தன்னுடைய திறமைகளை பற்றி கேள்வி எதுவும் எழாமல் கன்வின்ஸ் செய்பவராகவும் இருக்க வேண்டும்.

ஆனால், இந்த ஸ்டிரியோடைப் வட்டத்தில் சிக்காமல் இருக்கும் ஒரு சில ஹீரோக்களில் முதன்மையானவர்: ரிப் கிர்பி.

ஒரு கண்ணாடி அணிந்த ஹீரோவை நான் எந்த கதையிலும் படித்தது இல்லை (கிளார்க் கென்ட் சூப்பர் மேன் ஆக இல்லாத போது கண்ணாடி அணிவதை கணக்கில் எடுத்துக் கொள்ள முடியாது). அதிலும் ஹீரோக்கள் தனக்கு உதவியாக பெரும்பாலும் புத்திசாலியான ஒரு பெண்ணையோ (ஜானி நீரோ - ஸ்டெல்லா) அல்லது உடல் பலம மிக்கவரையோ (லாரன்ஸ் - டேவிட்) தான் தன்னுடைய சகாவாக கொண்டு இருப்பார்கள்.

ஆனால், ஐம்பது வயது கிழவரை தன்னுடைய துணைவராக கொண்டு, கண்ணாடி அணிந்து கொண்டு துப்பறியும் ஒரு காமிக்ஸ் ஹீரோ உண்மையிலேயே புதுமையானவர்தான். இந்த வித்தியாசமான கான்செப்ட் மூலம் ரிப் கிர்பி முதன் முதலில் வாசகர்கள் மனதை கவர்ந்தார்.

அவரைப் பற்றி விரிவாக அடுத்த பதிவில் பார்ப்போம். இந்த பதிவு ஒரு டீசர் தான்.

உங்கள் ஆதரவை நாடும் - ஜாலி ஜம்ம்பர்.

காதலரின் மங்கா காவியம்

2009-06-05T21:20:00.000+05:30

காட்டின் பாதையில் நடந்து கொண்டிருக்கிறது ஒர் லின்க்ஸ் பூனை. நிறைக் கர்ப்பமாக இருக்கும் அப்பூனையின் வயிற்றினுள் இரு குட்டிகள் காட்டிற்கு வருகை தர ஆயத்தமான நிலையில் உள்ளன. குட்டிகளை ஈனுவதற்காக பாதுகாப்பான ஒர் மறைவிடத்தை தேடிக் கொண்டிருகிறது அத் தாய்ப் பூனை. ஆனால் அதன் கண்களில் தெரிகிறது அகோரமான பசி.

கடந்த வருடம் பனிக்காலத்தில் உருவான ஒர் நோயால் லின்க்ஸ் பூனைகளின் வழமையான உணவான அமெரிக்க முயல்கள் இனம் அழிந்து போயின. அளவிற்கதிகமாகவிருந்த பனி வீச்சாலும், கடும் குளிராலும் தரையின் குளிர் நிலை உயர்ந்து விட, கானாங் கோழிகளில் பெரும்பாலானவை இல்லாது போயின. இலை துளிர் காலத்தின் போது பெய்த அடை மழை வேறு நீர் நிலைகளின் நீர் மட்டத்தை உயர்த்தி விட, மீன்களும் தவளைகளும் லின்க்ஸின் பாதங்களிற்கு எட்டாத தூரத்தில் ஆனந்தமாக நீந்தி விளையாடிக் கொண்டிருந்தன.

லின்க்ஸ் பூனை பசிக்கு எதிராக போராட வேண்டிய கட்டாயத்திலிருந்தது. அது தன் குட்டிகளை ஈனும் முன் பட்டினியால் இறந்து விடும் நிலை. இருப்பினும் அப்பூனை தனக்கு கிடைத்த ஆமை முட்டைகளையும், சிறிய இறால்களையும் உண்டு தன் உயிரை தக்க வைத்துக் கொண்டது. பின் ஒர் நாள் காட்டில் வீழ்ந்து கிடந்த பிரம்மாண்டமான மரமொன்றின் கோறையான நடுப் பகுதியில் தன் குட்டிகளை பாதுகாப்பாக ஈனுவதற்கான ஒர் மறைவிடத்தை கண்டு கொண்டது.

மேலும் படிக்க செட்டொனும் லின்க்ஸ் பூனையும்

அய்யம்பாலயத்துகாரரின் காமிக்ஸ் ஆராய்ச்சி

2009-02-16T16:27:00.000+05:30

தமிழ் கூறும் நல்லுலகில் 'காமிக்ஸ்' என்றாலே அது சின்னப்பசங்க சமாச்சாரம் என்ற எண்ணம் ஆழ வேருன்றி உள்ளது. இங்கு மட்டுமல்ல உலகெங்கும் அப்படிதான் இருந்திருக்கிறது. காலப்போக்கில் அந்த தவறான எண்ணம் மேலைநாடுகளில் மாறி விட்டிருக்கிறது. இங்கு மட்டும் காமிக்ஸ் வாசிப்பு அங்கீகரிக்கப்படாமலேயே தொடர்கிறது.

உண்மையில் காமிக்ஸ் வடிவில் செய்தி சொல்வது என்பது நமது ஆதி முன்னோர்களிடம் இருந்தே பரிணமித்து வந்திருக்கிறது. குகைச்சுவர்களில் தங்கள் அனுபவத்தில் கண்ட நிகழ்வுகளை குறியீடுகளாக வரைய தொடங்கிய மனிதன் பின்னர் ஒன்றுடன் ஒன்று தொடர்புடைய சித்திரங்களாக வரைய தொடங்கினான். இதுவே காமிக்ஸ் வடிவத்தின் தொடக்கம் என்று கூறலாம்.

மேலும் படிக்க...

ரபீக் ராஜாவின் ராணி காமிக்ஸ் நினைவுகள்

2009-01-19T05:44:00.000+05:30

ராணி காமிக்ஸ் வரலாற்றை திரும்பி பார்க்கும் போது, அதை மூன்று கால கட்டங்களில் வரையறுக்கலாம்:

பொற்க்காலம்
வசந்தக்காலம்
இருண்டக்காலம் மேலும் படிக்க

கன்னித் தீவு

2009-01-19T05:23:00.000+05:30

'கன்னித் தீவு' என்ற வார்த்தைகள் காமிக்ஸ் ஆர்வம் கொண்டோர்கள் மட்டுமல்ல சராசரி தமிழ் வாசகர்கள் கூட அறிந்தவை. தினத்தந்தியில் 47 வருடங்களாக தொடர்ந்து வெளிவரும் காமிக்ஸ் ஸ்ட்ரிப் கன்னித் தீவு. இது 1961 -இல் வெளிவர தொடங்கியிருக்க வேண்டும் என்பது என் கணிப்பு. தற்போதைய கன்னித் தீவு '17,226' நாட்களை தாண்டியுள்ளது.

தொடக்க காலத்தில் இரண்டாம் பக்க அடியில் வெளி வந்தது. பின்னர் இரண்டாம் பக்க மேற்பகுதியில் இன்றுவரை வெளியிடபடுகிறது. பாலன் என்ற ஓவியர் தான் தொடர்ந்து வரைந்து கொண்டிருக்கிறார்? 1961-இல் அவருக்கு வயது 20 என்றாலும் கூட தற்போது அவருக்கு 67 வயதாக இருக்க வேண்டும். இது சாத்தியமில்லை. எனவே தற்போதுள்ள பாலனும், ஆரம்ப கால பாலனும் ஒருவரே என்பது கேள்விக்குரியதே! சித்திரங்களின் தரத்தை எடுத்துகொண்டாலும் கூட சற்று கூட ஒப்பிட முடியாத அளவிலேதான் இருக்கின்றன. சிந்துபாத், லைலா, மந்திரவாதி மூசா இவர்கள் தான் முக்கியமான பாத்திரங்கள். எனக்கு தெரிந்தவரை கன்னித் தீவு கதையை 'சுருக்கமாக' இப்படி சொல்லலாம். மேலும் படிக்க

சென்னை புத்தகக்காட்சி மூலமாக மீண்டும் காமிக்ஸ் புரட்சி

2009-01-16T01:42:00.000+05:30

சென்னை புத்தக திருவிழாவில் காமிக்ஸ் கிடைப்பது பற்றி லக்கிலூக் பதிவில் வந்துள்ள மேட்டர் !!!

///சென்னை புத்தகக்காட்சி மூலமாக மீண்டும் காமிக்ஸ் புரட்சி. ஸ்டால் எண் 35, இன்ஃபோ மேப்ஸ் அரங்கில் லயன் மற்றும் முத்து காமிக்ஸ்கள் ஐந்துரூபாய், ஆறு ரூபாய் விலைக்கு ஏராளமாக கிடைக்கிறது. ரூபாய் நூறு விலையில் பெரிய சைஸ் கவுபாய் ஸ்பெஷலும் அங்கேயே கிடைக்கிறது. எழுத்தாளர் எஸ்.ராமகிருஷ்ணன், பதிப்பாளர் பத்ரி, மருத்துவர் ப்ரூனோ, கவிஞர் யெஸ்.பாலபாரதி உள்ளிட்ட ஏராள பிரபலங்கள் காமிக்ஸ் புத்தகங்களை மொத்தமாக வாங்கியிருப்பது குறிப்பிடத்தக்கது.

அவ்வரங்கில் இருக்கும் அருண் என்ற நண்பரை தொடர்பு கொண்டால் புத்தகங்களை விலை மற்றும் தரம் வாரியாக பிரித்து செட்டாக எடுத்துக் கொடுப்பார்.சித்திரக்கதை வடிவிலான சீரிய இலக்கியம் ஒன்று இரு நூலாக விடியல் மற்றும் கீழைக்காற்றில் கிடைக்கிறது. சிம்புதேவனின் ’கி.மு.வில்...’ முழுநீள கார்ட்டூன் தொடர் புத்தகம் நர்மதாவில் கிடைக்கிறது////

மேல் விவரம் இங்கே க்ளிக்

“லக்கிலுக்கும் டால்டன்களும்” - சினிமா ட்ரைலர்!

2008-07-03T16:06:00.000+05:30

லக்கிலுக்கின் தாயில்லாமல் டால்டன் இல்லை!!

2008-05-23T09:40:00.000+05:30

முதலில் லயன் Jolly Special குறித்தும், Cowboy Special குறித்தும் எழுத வேண்டும் என்று தான் நினைத்திருந்தேன். ஸ்பெஷல் இதழ் கையில் கிடைத்ததும் முதலில் தேடிப்போய் படித்தது டெக்ஸின் கதைகளைத் தான். ஒன்று மொக்கையோ மொக்கையாகப் போய் விட, அடுத்தது வடிவம் என்னும் வகையில் சிறப்பாகவே இருந்தது. ஆனால் கொஞ்சம் வளர்ந்து தொலைத்து விட்டதால் அதன் Plot ( செவ்விந்திய எழுச்சியை ஒடுக்குவது) நொருடலாக இருந்ததால் அந்த நெருடல் பற்றி ஒரு பதிவை எழுதினேன். அந்தப் பதிவில் இன்னும் கொஞ்சம் Tinkering வேலை பாக்கி இருக்கிறது. எனவே ஸ்பெஷல் இதழோடு வந்திருந்த லக்கிலுக்கின் "தாயில்லாமல் டால்டன் இல்லை" கதை பற்றி இந்த Stop Gap பதிவு.

முதலில் ஒன்றை சொல்லியே ஆக வேண்டும் - அதாவது நம்ம ஊர் வடிவேலு ஜோக்கை ரசிக்கும் எவரையும் டால்டன் ப்ரதர்ஸ் தமது கோமாளிக் கூத்துகளால் கட்டிப் போட்டு விடுவார்கள். சிரிப்புத் திருடர்கள் - நாம் சிரித்துக் கொண்டிருக்கும் போதே நம் இதயத்தைத் திருடி விடுவார்கள். எகிடு தகிடாக ஏதாவது செய்து திரும்பத் திரும்ப லக்கிலுக்கிடம் மாட்டிக் கொள்ளும் sweet rascals. இந்தக் கதையைப் பொருத்தளவில் லக்கிலூக்கை விட அதிகம் ஸ்கோர் செய்திருப்பது டால்டன்ஸ் தான். அதிலும் மா டால்டனின் "கொள்ளைகள்" உண்மையாகவே நம் இதயத்தைக் கொள்ளை கொள்ளும் ரகங்கள். இந்தக் கொள்ளையைத் தடுக்க லக்கிலுக்காலும் கூட முடியாது ;-)

கதை என்று பார்த்தால்... ஒரே ஒரு ஊரில் ஒரு கொக்காம், அதைப் பிடிக்க ஒருத்தன் நினைத்தானாம் - அவன் என்ன செய்தானாம்?? - அந்தக் கொக்கின் தலையில் வென்னெயை வைத்தானாம் - அட ! அப்புறம்? - அந்த வென்னை உருகி கொக்கின் கண்களை மறைத்த போது நடந்துபோய்ப் கொக்கைப் பிடித்தானாம் - இந்த ரகத்தைச் சேர்ந்த கதைதான். ஆனால் அது ஒரு மேட்டரே இல்லை என்னும் அளவிற்கு காமெடியான சம்பவங்களின் கோர்வையான கலக்கல் தான் தாயில்லாமல் டால்டன் இல்லை.

வழக்கம் போல் டால்டன்கள் சிறையில் வாட, அவர்களின் அம்மாவான மா டால்டன் வெளியே 'தவித்துக்' கொண்டிருக்கிறார். முறையாககாசு கொடுத்து கடைகளில் பொருட்கள் வாங்குவது என்பது டால்டன்களின் குலப்பெருமைக்கே பங்கமான விஷயம் என்பதால் அவர் தேவைப்படும்போதெல்லாம் பக்கத்திலிருக்கும் கடைகளுக்கு துப்பாக்கியோடு வந்து "கொள்ளையடிப்பது" வழக்கம். பார்ட்டி படு கெயவி என்பதால் கடைக்காரர்களும் இந்தக் "கொள்ளைக்கு" ஒத்துழைக்கிறார்கள். இந்நிலையில் மா டால்டன் தனது சீமந்த புத்திரர்களுக்கு ஒரு கடிதம் எழுதுகிறார். அந்தக் கடிதத்தில் "ஜெயிலேர்ந்துதப்பிச்சுப் போறதாயிருந்தா ஜலதோஷம் பிடிச்சுக்காம பார்த்துக்கோங்க.." என்கிற அக்கறையான வரிகள் இருக்கிறது. இதைக் கண்டவுடன் ஜூனியர் டால்டன்களுக்கு தாய்ப் பாசம் பீறிட்டுக் கிளம்புகிறது.

அப்புறம் என்ன நடந்திருக்கும்? அஃதே! டால்டன்கள் தப்பிக்கிறார்கள். எப்படி? அங்கே தான் வருகிறது டால்டன்களின் வழமையான குயுக்தியானமூளை.
ஜெயிலையே தீயிட்டு எரித்து விடுவது என்கிற அட்டகாசமான ப்ளானை கும்பலின் 'தலை'யான ஜோ முன்வைக்கிறான். திட்டப்படி ஜெயில் எரிகிறது - அதே திட்டப்படி டால்டன்கள் தப்பிக்கிறார்கள். தப்பித்தவர்கள் தாயைத் தேடி நேராக ஊர் வந்து சேர்கிறார்கள். வழக்கம் போல இவர்களைக்கண்டுபிடித்து ஒப்படைக்கும் பணி நம் ஹீரோ லக்கியின் தலையில் விழுகிறது. கதையின் துவக்கத்திலேயே அந்த ஊர் சுரங்கத் தொழிலாளர்களின்சம்பளப்பண பெட்டகத்திற்கு காவலாக ( வழியில் நடந்த நாப்பத்தி மூணு கொள்ளை முயற்சியை முறியடித்து ) அதே ஊருக்கு வந்து சேர்ந்துஏற்கனவே அங்கே தான் டேரா போட்டுக் கொண்டு காத்திருக்கிறார்.

ஊருக்கு வந்து சேரும் டால்டன் ப்ரதர்ஸ் தாயின் routine வாழ்க்கையைக் காண்கிறார்கள்; அதிலிருந்து அவர்களுக்கு அருமையான திட்டம் ஒன்று தோன்றுகிறது. அதன்படி மா டால்டன் போல வேடம் போட்டுக் கொண்டு அவ்வூரின் கடைகண்ணிகளுக்குள் நுழைய வேண்டியது - அவர்களும் மா டால்டன் தானே என்று கேஷுவலாக இவர்களை எதிர் கொள்ளும் போது அதிரடியாக மிரட்டிக் கொள்ளையடிக்க வேண்டியது. அப்புறம் கேட்க வேண்டுமா - டால்டன் ப்ரதர்ஸின் கைவரியால் சுத்துப்பட்டு பதினெட்டுப் பட்டியும் அல்லோலகல்லோலப்படுகிறது. இதை எப்படி நம் ஹீரோ துப்புத்துலக்கி கண்டுபிடிக்கிறார்; டால்டன்கள் கைது செய்ப்பட்டார்களா இல்லையா? என்பதையெல்லாம் நீங்களே வெள்ளித்திரையில் பார்த்துத் தெரிந்து கொள்ளுங்கள் ( லயன்ஆபீஸுக்கு போன் போடுங்கப்பா இன்னும் ஸ்டாக் வைத்திருப்பார்கள்).

கதையில் இரண்டு கேரக்டர்கள் பற்றி சொல்லியேயாக வேண்டும் ஒன்று ரின்-டின்-கேன் அடுத்து one of the Dalton - ஆவரெல்.

ரிண்டின்கேன் பற்றிப் படிக்கும் போதெல்லாம் எங்கள் வீட்டு Rummyன் நினைவு தான் எனக்கு வரும். இருபதிநாலு நகங்கள் இருக்கும் நாய் ஆக்ரோஷமாய் இருக்கும் வீட்டுக்குள் தெரியாதவர்கள் வந்தால் விடாது என்று சொல்லித் தான் எங்கள் தாத்தா எங்கிருந்தோ அவனைக் கூட்டிவந்தார்கள். முதலில் அவனுக்கு இரண்டு வயதாகும் வரை அவன் வாய் திறந்து குலைக்கவேயில்லை. நாங்களெல்லாம் ஊமையோ என்று கூடநினைத்திருந்தோம். அப்புறம் கடும் புலனாய்விற்குப் பிறகு அவன் இரவு மொட்டை மாடியில் தனியே நின்று கொண்டு தன் வாய்க்குள்ளேயே குலைக்கிறான்என்பதை தாத்தா கண்டுபிடித்தார்( அது கூட பக்கத்து வீட்டு பிகரின் - பொமரேனியன் - கவனத்தைக் கவரவே) . சாது என்றால் அப்படியொரு சாது - வாய்க்குள் கையை விட்டால் கூடக் கடிக்காது. அக்கா பையன் தொண்டைக் குழி வரைக்குமே கூட கையை விட்டிருக்கிறான்.. ம்ம்ஹூம் அமைதியாக வாயைத் திறந்து காட்டிக் கொண்டு உட்கார்ந்திருக்குமேதவிர கடித்ததில்லை. கோலங்கள் சீரியலை அவன் மும்முரமாக பார்த்துக் கொண்டிருக்கும் போது சானல் மாற்றினால் மட்டும் முகத்தைச்சுழித்திருக்கிறான் - நான் பார்த்திருக்கிறேன். ஆனால் நான் இதைச் சொன்னபோது யாருமே நம்பவில்லை.

அவன் செய்யும் சேட்டைகளுக்கோ அளவே இருக்காது. வீட்டில் மொஸைக் தரையில் வழுக்கி விழுந்து விழுந்து தரையைப் பிராண்டிக் கொள்வதைபார்க்க வேண்டுமே.. ரிண்டின் செய்யும் குறும்புகள் அத்தனையும் எனக்கு rummyயைத் தான் நினைவூட்டும்.

சிறையில் இருந்து தப்பிக்கும் டால்டன்களோடு ஒட்டிக் கொள்கிறான் ரிண்டின். ஆங்.. அவன் ஜோவின் கையோடு பினைக்கப்பட்டிருக்கும்சங்கிலியின் மறுமுனையில் சேர்த்துக் கட்டப்பட்டிருக்கிறான். மா டால்டனின் செல்லக்குட்டியான ஸ்வீட்டி பூனையை அவன் துரத்த - அவன் சங்கிலியோடு இனைக்கப்பட்டிருக்கும் ஜோவும் கூடவே தரதரவென்று இழுத்துச் செல்லப்பட.. அதகளம் தான்.

ஒரு கட்டத்தில் ரிண்டின் லக்கிலுக்கின் கையில் சிக்கிக் கொள்கிறான். அதற்கு சற்றுமுன்னே அவனிடம் படுத்துக் கொள்ளச்சொல்லி மா டால்டன் உத்தரவு போட்டு விடுகிறாள். எந்தவொரு உத்தரவாயிருந்தாலும் அதைப் பிறப்பித்தவர்கள் வந்து சொல்லும் வரை அப்படியே பின்பற்றுவது தான்ரிண்டினின் வழக்கம். எனவே லக்கி போகுமிடமெல்லாம் குழந்தையை வாரியனைத்து தூக்கிச் செல்வதைப் போல் தூக்கிச் செல்ல வேண்டியதாகிறது.கடைசியில் டால்டன்களின் இருப்பிடம் குறித்தும் ரிண்டின் மூலம் தான் லக்கிக்குத் தெரிய வருகிறது - எனவே ரிண்டின் கேரக்டர் படு பயங்கரமானதொரு திருப்பத்தை ஏற்படுத்தும் கேரக்டராகவும் இருக்கிறது.

அடுத்து ஆவரெல் - "ஆமாம் சிறையைக் கொளுத்தி விட்டால் நம்மையெல்லாம் மீண்டும் பிடித்த பிறகு எங்கே அடைப்பார்களாம்?" என்று தனது entry வசனத்தில் கேட்டு ஜோவை காண்டேத்துவதில் ஆரம்பித்து, மா டால்டனைக் கவர பித்துக்குளித்தனமான காரியங்கள் செய்வது வரையில் நமக்குப் பல இடங்களில் வயிற்று வலி வரக் காரணகர்த்தாவாய் இருக்கிறான்.

மொத்தத்தில் - நல்லதொரு வடிவத்தில் - கலர் படங்களில் நம்மை மீண்டும் மீண்டும் படிக்கத் தூண்டும் வகையில் இருக்கிறது "தாயில்லாமல் டால்டன் இல்லை"

பி-கு 1 : கதையில் சொல்லப்பட்டிருப்பது போல் மா டால்டன் ஒன்றும் fraud lady இல்லை. அடிலைன் லீ யாங்கர் என்னும் நிஜப் பெயர் கொண்ட இவர் நிஜத்தில் தனது கணவரையும் புதல்வர்களையும் திருத்தப் படாத பாடெல்லாம் பட்டிருக்கிறார்.

பி-கு 2: லக்கிலுக் கதையைப் பற்றி சொல்ல வந்து அது டால்டன் புராணமாகப் போய் விட்டதால் நமது லக்கியார் கோபித்துக் கொள்ளலாகாது!!

லக்கிலுக் அனிமேஷன் படம் பார்க்கறீங்களா?

2008-05-02T15:04:00.000+05:30

Online Videos by Veoh.com

லக்கிலுக்கின் அதிரடி அறிமுகம் - சலனப் படம்

2008-04-24T00:31:00.000+05:30

காமிக்ஸ் கௌபாய்களில் இரவுக்கழுகாரை விட எனக்கு அதிகமாகப் பிடிப்பது நம்ம லக்கிலுக்கைத்தான். லக்கிலுக்கின் கதைகளில் வரும் சித்திரங்களை, ஒவ்வொரு கதாபாத்திரங்களை இரசிப்பதிலேயே அதிக நேரம் செலவிட்டிருக்கிறேன். யூடியூப்பில் உலவிக்கொண்டிருந்தபோது எதேச்சையாக லக்கிலுக்கின் அறிமுகம் என்ற இந்த சலனப் படத்தைப் பார்த்து மகிழ்ந்து யாம் பெற்ற இன்பம் பெறுக இவ்வையகமும் என இதோ உங்களுக்காக...

இந்தச் சலனப் படத்தில் லக்கிலுக்கின் நிழலைவிட வேகமானவர் என்பதைக் காணமுடியும். அடிதடி ஜேன், டால்டன் சகோதரர்கள் மற்றும் டின்டின் நாய் என்பவற்றையும் காணலாம். எந்தக்க கதையில் வந்தாலும் சூதாட்டத்தில் ஏமாற்றும் அந்தக் கறுப்புக் கோட்டுப் பயலின் பெயரை மறந்துவிட்டேன். "ஒரு கோச் வண்டியின் கதை"யிலும் அந்தச் சூதாட்ட மேதை வருவார். அந்தப் பயலின் பெயரை தெரிந்தால் யாராவது பின்னூட்டத்தில் போட்டுவிடுங்கள்.

லக்கிலுக் - சில குறிப்புகள்!

2008-04-17T14:46:00.000+05:30

* பெல்ஜியத்தில் வாழ்ந்த ஓவியரான மோரிஸ் என்பவரின் சிந்தனையில் உதித்த கார்ட்டூன் கவுபாய் பாத்திரம் தான் லக்கிலுக். 1946ல் அவர் முதன்முதலாக லக்கிலுக்கை வரையத் தொடங்கினார். 2001ல் அவர் மறையும் வரை கசாப்புகடைக்காரன் ஆடுகளை போட்டுத் தள்ளுவதை போல தொடர்ந்து வரைந்து தள்ளிக் கொண்டே இருந்தார். மொத்தமாக எழுபத்தி இரண்டு லக்கிலுக் காமிக்ஸ்கள் உருவாக்கப்பட்டதாக சொல்கிறார்கள்.

* 1850களுக்கு பிறகு அமெரிக்காவில் வாழ்ந்த மாவீரனாக லக்கிலுக் கதாபாத்திரம் சித்தரிக்கப்பட்டிருக்கும். லக்கிலுக் தன் நிழலை விட வேகமாக இயங்கக் கூடியவர். அவர் துப்பாக்கியை இயக்கி முடித்த பின்னர் தான் அவரது நிழல் துப்பாக்கி உறையிலேயே கையை வைக்கும்.

* நீதிக்கும், நேர்மை பரிபாலனத்துக்கும் தன் உயிரைக்கூட பணயம் வைப்பார் லக்கி.

* மொள்ளமாறிகள், முடிச்சவிக்கிகள், கேப்மாரிகள் மற்றும் சொறிநாய்களுக்கு என்றுமே லக்கி சிம்மசொப்பனம் தான்.

* லக்கியின் ஒவ்வொரு கதை இறுதியில் “தனிமையே என் துணைவன், தனிமையே என் வாழ்க்கை” என்று பாடியவாறே செல்வார்.

* லக்கி ஆரம்பக்கட்டத்தில் செயின் ஸ்மோக்கராக இருந்தார். எப்போதும் புகைவழியும் வாய் அவருடையது. 1983க்கு பின்னர் அவர் தம் அடிப்பதை நிறுத்தினார். தம்முக்கு பதிலாக ஏதோ ஒரு குச்சியை வாயில் சும்மானாச்சுக்கும் வைத்திருப்பார். லக்கிலுக் கதைகளில் சிகரெட் தடை செய்யப்பட்டதற்காக உலக சுகாதார நிறுவனம் அதன் படைப்பாளிகளை கவுரவித்தது.

* லக்கிலுக் கதைகள் அனைத்துமே இரட்டை கதாநாயகர்களை கொண்டது. ஒரு கதாநாயகன் லக்கிலுக், இன்னொரு கதாநாயகன் ஜாலி ஜம்பர். லக்கிலுக்கின் குதிரை. லக்கியை விட அவரது குதிரை புத்திசாலி.

* ரின் டின் என்ற ஒரு லூசுநாய் லக்கிலுக்கின் அனேக கதைகளில் வந்து அவரை வெறுப்பேற்றும்.

* அமெரிக்க வரலாற்றில் நிஜமாகவே வாழ்ந்த பல கதாபாத்திரங்கள் லக்கிலுக்கின் கதைகளில் இடம்பெறும். அடிதடி ஜேன், பொடியன் பில்லி, ஜட்ஜ் ராய் பீன், முடிச்சவிக்கி ஜெஸ்ஸி ஜேம்ஸ், மொள்ளமாறி கூட்டமான டால்டன் சகோதரர்கள் ஆகியோரை லக்கிலுக் கதைகளில் காணலாம்.

டால்டன் சகோதர்கள்

பொடியன் பில்லி

அடிதடி ஜேன்

ஜட்ஜ் ராய்பீன்

ஜெஸ்ஸி ஜேம்ஸ்

* குறிப்பாக டால்டன் சகோதரர்கள் லக்கிலுக்குக்கு நன்றாக தண்ணி காட்டுவார்கள். அந்த டால்டன் சகோதர்களுக்கே லூசு நாய் ரின் டின் அட்டகாசமாக தண்ணி காட்டும்.

* அந்த காலத்தில் அமெரிக்காவில் புகழ்பெற்ற கோச்சு வண்டி கம்பெனியான வெல்ஸ் பார்கோ, உலகின் முதல் கூரியர் சர்வீஸ் நிறுவனமான போனி எக்ஸ்பிரஸ் போன்ற நிறுவனங்களை லக்கிலுக்கின் சாகசங்களில் காணமுடியும்.

* மற்ற கவுபாய் கதைகளை ஒப்பிடும்போது லக்கிலுக் கதைகளில் செவ்விந்தியர்கள் வருவது மிகக்குறைவே.

* லக்கிலுக் கதைகள் நான்கு திரைப்படங்களாக இதுவரை வந்திருக்கிறது. டிவி தொடராகவும், வீடியோ விளையாட்டுகளாகவும் கூட லக்கிலுக் தரிசனம் தந்திருக்கிறார்.

* லக்கிலுக் கதைகளை வாசித்தால் பத்தொன்பதாம் நூற்றாண்டின் அமெரிக்கா குறித்த வரலாற்று அறிவைப் பெறமுடியும். அன்றைய அமெரிக்காவில் நடந்த பல சம்பவங்கள் லக்கிலுக் கதைகளில் காட்சியாக விரியும்.

* சில லக்கிலுக் கதைகளின் அட்டைப்படங்கள் :

காமிக்ஸ்.. சில பழைய நினைவுகள்..!

2008-04-16T18:35:00.000+05:30

நான் பொடியனாக இருந்த காலத்தில் செமக் குறும்புக்காரனாம். வீட்டில் அடங்கவே மாட்டேனாம். ஒரு கட்டத்தில் என்னை கட்டில் காலோடு சேர்த்துக் கட்டியெல்லாம் கூட வைத்திருந்திருக்கிறார்கள். ஒரு கட்டத்தில் எதுவும் வேலையாகமல் போய் விட அப்பாவுக்கும் அம்மாவுக்கும் 'இவன் வீட்டோடு அடங்காத அடங்காப்பிடாரனாக ஆகிவிடுவானோ' என்று பயம் ஏற்பட்டிருக்க வேண்டும். என்னை ஒரு இடத்தில் கட்டி வைக்க என்ன செய்யலாம் என்று யோசித்த அப்பாவிற்கு அவரது நன்பர் கொடுத்த யோசனை தான் சித்திரக்கதைகளும் சிறுவர் இலக்கியமும். அது நான் ஐந்தாம் வகுப்பு படித்துக் கொண்டிருந்த சமயமாய் இருக்கும் என்று நினைக்கிறேன்; ஒரு நாள் அப்பா வீட்டுக்கு வேலை முடிந்து திரும்பி வரும்போது ஒரு புத்தகம் வாங்கி வந்தார். தலைப்பு "பாலமித்ரா" என்று இருந்தது.

அன்று தொடங்கிய பந்தம் தான் அது. இதோ இப்போது இரத்தப்படலத்திற்கு முன்பதிவு செய்து கொரியர் அனுப்பி விட்டு மூன்றாவது முறையாக லயன் அலுவலகத்திற்கு போன் செய்து "கொரியர் வந்திச்சா சார்" என்று கேட்டு விட்டு - "என்ன எழவுடா கொரியர் சர்வீஸ் நடத்தறான்" என்று புலம்பிக்கொண்டிருக்கிறேன் :-)

பாலமித்ரா தான் நான் முதல் முதலாக வாசித்த சிறுவர் இலக்கியம். சிறுவர் இலக்கியம் என்கிற வார்த்தையே தவறோ என்று இப்போது படுகிறது - ஏனெனில் அதில் அன்று வந்த பல கருத்துகள் இப்போது வளர்ந்த குழந்தைகளுக்கும் கூட பொருந்தி வரக்கூடிய ஒன்றாகத்தான் இருக்கிறது. பழைய பாலமித்ராவை இப்போது எடுத்து வாசித்தாலும் அந்த நடை அப்படியே கட்டிப்போடுவதாக இருக்கும். என்ன ஒன்று - கொஞ்சம் ஧மல்மருவத்தூர் மகிமை, சாய்பாபா மகிமை என்றெல்லாம் கடைசியாக வரும் சிறுகதையில் மொக்கை போட்டிருப்பார்கள். But its okay!! ;-)

புத்தகம் என்னை ஓரிடத்தில் அமர்த்தி வைப்பதை பார்த்த அப்பா, பின் அம்புலிமாமா இதழ்களும் வாங்கி வர ஆரம்பித்தார். புதிய இதழ்கள் தவிர பழைய புத்தகக் கடைக்குச் சென்று பழைய இதழ்களையும் அரை விலைக்கு வாங்கி வந்து கொடுப்பார். விக்ரமாதித்தன்-வேதாளம் கதைகளுக்கு அந்தக் காலத்தில் நான் வெறித்தனமான ரசிகன். புத்தகம் கைக்கு வந்ததும் வேறெந்தக் கதைகளையும் விட முதலில் தேடிப்பிடித்து வாசிப்பது விக்ரமாதித்தன் கதையைத் தான்.

இப்படியாக வாசிப்புப் பழக்கம் ஒட்டிக் கொண்ட பின், அதே அலைவரிசையில் இருந்த வேறு சிலரும் நன்பர்களானார்கள். பூபதி, சேகர், குணா, நித்யா குணாவின் அண்ணா என்று நாங்கள் ஒரு செட். எங்களுக்குள் புத்தகங்கள் எக்ஸ்சேஞ்ச் செய்து கொள்வோம். அப்படி நடந்த எக்ஸ்சேஞ்சில் ஒரு நாள் கையில் கிடைத்தது தான் ராணி காமிக்ஸ். பொதுவாக அது வரைக்கும் நானே புத்தகம் வாங்க கடைகளுக்குப் போனதில்லை. அப்படி ஒரு தேவை ஏற்பட்டதும் இல்லை. அப்பா தான் வாங்கி வருவார் - அதிலும் காமிக்ஸ்களுக்கு Strict NO!!. Only அம்புலிமாமா/பாலமித்ரா.. எப்போதாவது மாயாஜாலக் கதைகள். எனவே காமிக்ஸ் என்கிற ஒரு வடிவம் இவ்வளவு சுவாரசியமான ஒன்று என்பதே எனக்கு ரொம்ப நாட்களாகத் தெரியாமலேயே இருந்திருக்கிறது. அப்படி ஏன் காமிக்ஸ்களை என்னிடம் இருந்து அப்பா மறைத்து வைத்தார் என்பதை நான் முதல் காமிக்ஸ் வாசித்த போதே புரிந்து கொண்டேன்.

குணாவின் அண்ணா பிரகாஷ் அப்போது பத்தாவது முடித்து ரிசல்ட்டுக்காக காத்துக் கொண்டிருந்தார். எங்களுக்கு அது எட்டாவது பெரிய பரிட்சை லீவு சமயம். அவரிடம் நான் கொஞ்சிக் கூத்தாடி வாங்கியது ஜேம்ஸ் பாண்ட் கதை. பெயர் நினைவில் இல்லை - கதை கூட நினைவில் இல்லை. ஆனால் அந்த படங்கள் நன்றாக நினைவில் இருக்கிறது. குறிப்பாக அந்த அழகிய வில்லிகளும் கதாநாயகிகளும். பாண்டின் துப்பாக்கி சாகசங்கள் ஈர்த்ததோ இல்லையோ அந்த வயதில் அவரின் கட்டில் சாகசங்கள் நிறையவே ஈர்த்தது. இது போன்ற விடயங்களில் Exposure கிடைத்தவுடன்எல்லா பையன்கள் போல நானும் ரகசியமானவனாகிப் போனேன். பால் வித்தியாசம் தெரியாமல் எதிர்வீட்டு நித்தியாவுடன் நான் விளையாடிய விளையாட்டுகள் சுத்தமாகக் குறைந்து விட்டது. சில நாட்களிலேயே எனது குரல் உடைந்து போனது. மிலிட்டரி தாத்தா ஒரு குறும்புச் சிரிப்புடன் சொன்னார் - "ம்ம்ம்... பேராண்டி வயசுக்கு வந்துட்டான்..."

எனது விடலை நாட்களின் முக்கியத்தருணங்கள் பலவற்றுக்கும் காமிக்ஸ் ஏதோவொரு வகையில் காரணமாக இருந்திருக்கிறது. ஒருவேளை நான்கௌபாய்களை இமிடேட் செய்ய முயன்று, ஒரு மார்க்கமாக விளக்கெண்ணை குடித்தவன் போலவே இறுக்கமாக அலைந்து திரிந்ததால் தான் எனக்குப் பெண் அதிகம் நன்பர்கள் இல்லாமலேயே ( மெய்யாலுமேங்க) போய் விட்டார்களோ என்று இப்போதும் மனதில் ஓரத்தில் ஒரு சந்தேகம் இருக்கத்தான் செய்கிறது. எனக்கு "குரல் உடைய" காரணமாக இருந்ததோடு ஜேம்ஸின் அந்த அழகிய காதலிகள் ஜகா வாங்கிக் கொண்டு விட்டார்கள்..மற்றபடி எனது விடலை நாட்களின் கனவுகளில் நான் இடுப்பின் இரண்டுபுறமும் சொருகிய கைத்துப்பாக்கியோடும், கெண்டைக்காலில் முள் உருண்டை கொண்ட ஷூவும், ஒரு புறம் சாய்ந்த வட்டத் தொப்பியுமாகவே அலைந்து திரிந்து கொண்டிருந்தேன்.

இதோ நாலு கழுதை வயசாகிவிட்டாலும், லயனின் அட்டைப் படத்தில் டெக்ஸைப் பார்த்ததும் வாய் தானாகவே "வாவ்" என்கிறது.. "இருளின் மைந்தர்கள்" இதழை ஒரு முப்பது முறையாவது படித்திருப்பேன்.. பல பக்கங்கள் அக்கக்காக உதிரும் நிலைக்கு வந்து விட்டது; செல்லோ டேப் போட்டு கிட்டத்தட்ட லேமினேட் செய்தே வைத்திருக்கிறேன். உரிமையோடு எனது பர்ஸில் இருந்து பணம் எடுக்கும் எனது அக்கா கூட தப்பித் தவறி எனது காமிக்ஸ் கலெக்ஷனை மட்டும் தொடவே மாட்டாள். என்னளவில் அவையெல்லாம் பொக்கிஷங்கள்; அவைகளெல்லாம் கால இயந்திரங்கள்.என்னை எனது பழைய உலகத்துக்கு கடத்திச் செல்லும் கால இயந்திரங்கள்.. ஒவ்வொரு புத்தகத்தைத் தொடும் போதும் ஒரு சம்பவம் நினைவுக்கு வரும் - "இது குணா கொடுத்தது" "இது நித்யா கிட்டேயிருந்து சுட்டது" "ஹேய்..அவளுக்கு இரண்டாவதா பையன் பிறந்திருக்கானில்லே" "இது இரும்புக் கை மாயாவி புத்தகத்தை தொலைத்ததற்கு ஈடாக சேகரிடம் வாங்கியது"......

சரி சரி போதும் போதும்...

பழைய நினைவுகளில் உலாத்துவது என்னளவில் ஒரு சுகானுபாவமாகத் தான் இருக்கிறது.. ஆனாலும் இந்த பதிவைப் பொருத்தமட்டில் மேற்கொண்டு உங்களை நான் போரடிக்க விரும்பவில்லை. லயன் கௌபாய் ஸ்பெசலுக்காகவும், ஜாலி ஸ்பெசலுக்காகவும் வெயிட் பண்ணிகிட்டிருக்கேன் ( ஏரியா தபால்காரர் நொந்துட்டார் ). வந்ததும் அதைப் பற்றி எழுதி உங்களை மீண்டும் போரடிப்பேன்.

அது வரை...

bye bye Friends!!!

மறுபிறவி எடுக்கும் காமிக்ஸ் புத்தகங்கள்

2008-01-30T22:08:00.000+05:30

நன்றி தமிழ்குட்டி.

மாயாவிகளின் உலகில்

2007-10-09T11:50:00.001+05:30

உயிர்மை- செப் 2003 -
வார்த்தைகளும் படங்களும் -
டிராட்ஸ்கி மருது

கட்டுரைத் தொடரில் இருந்து சில பகுதிகள்.

*

1950 களின் மத்தியில் முதலாம் வகுப்பு படிக்கும் போதே இந்த நோய் என்னைப் பீடித்து விட்டது. இன்று வரை அது தீரவே தீரவில்லை என்பதுடன் அந்த நோய் தரும் மயக்கம் சுகமான அனுபவமாகவும் மாறி விட்டது.அம்மயக்கத்தினூடே என்னைப்போல ஆரோக்கியமும் மகிழ்ச்சியும் கொண்டவனை நீங்கள் காணவே முடியாது என்றுதான் கூறுவேன். உலகம் முழுவதிலும் என்னைப் போன்ற நோயாளிகளுக்கு கணக்கே இல்லை. அவர்களும் அவரவர் நாடுகளில் இன்றைய நவீன கலாச்சாரச் சூழலில் 'மிக ஆரோக்கியமானவர்களாக' இருந்து வருகிறார்கள். அத்தகைய சூழல் இங்கு இல்லாததால் அந்த ஆரோக்கியம் எனக்குக் கிட்டாமல் போய்விடக்கூடாது என்று அலைந்து திரிந்து அந்த மயக்கத்தில் என்னை ஈடுபடுத்திக் கொண்டிருக்கிறேன்.

மதுரையில் 1956-57 களில் மிகச்சிறிய வயதில் என் தந்தை என்னையும் என் சகோதரர்களையும் ரீகல் டாக்கீஸுக்கு அழைத்துச் செல்வார். அப்படிச் செல்லும்போது அவருடைய பால்யகால நண்பர் சுவாமிநாதன் டவுன் ஹால் சாலையில் நடத்திய 'பாரதி புத்தக நிலையத்தில்' சுமார் இரண்டு மணி நேரம் செலவிடுவோம். தியேட்டருக்குப் போகுமுன் புத்தகக் கடையிலிருந்த வெளிநாட்டு காமிக்ஸ்கள் அனைத்தையும் பார்த்துவிட வேண்டும் என்ற வேகத்தில் புரட்டிக் கொண்டிருப்பேன். இன்றுவரை அந்த உணர்ச்சி வேகம் அப்படியேதான் இருக்கிறது.மிகுந்த ஆசையுடன் பல புத்தகங்களை வாங்கினாலும் எல்லாப் புத்தகங்களையும் வாங்க முடியவில்லையே என்ற பெரும் ஏமாற்றத்துடன் தான் எப்போதும் திரும்புவேன்.
...
...
...
டார்ஜான் என்னைக் கொள்ளை கொண்ட பாத்திரம். டார்ஜானின் உடல் அமைப்பை வரைந்து பார்ப்பது ஒரு வளரும் ஓவியனுக்கு மிகச்சிறந்த பயிற்சியாகும். காமிக்ஸ் ஓவியர் ஹேகார்த் வரைந்த சிங்கத்தின் வாயைப் பிளக்கும் டார்ஜானை வரைந்து பார்த்துப் பெருமைப் பட்டுக் கொள்வேன்.

....
....
....
படங்களோடு தொடராக நடத்தப் படுகிற, சொல்லப் படுகிற காமிக்ஸ் புத்தகங்களைச் சிறுவயதில் பார்க்க ஆரம்பித்த நான் அனிமேஷன், கிராபிக் நாவல். இண்டர்நெட், செல்போன்வழி அனுப்பப் படும் அனிமேட்டட் பிக்சர் மெசேஜ், டிஜிட்டல் சினிமா, எல்சிடி ஹோர்டிங், என அதன் பல பரிணாமங்களைப் பார்த்துக் கொண்டிருக்கிறேன். படங்கள் மற்றும் காமிக்ஸ்களின் மொழிதான் இந்த நூற்றாண்டின் மொழியாக அறியப்படும் என்பதில் எந்த சந்தேகமும் இல்லை. சொல்ல முடியாதவற்றையெல்லாம் இந்த ஊடகத்தில் சுலபமாக சொல்லிவிட முடிகிறது. மற்ற நாடுகளை விட ஜப்பானியரும், பிரெஞ்சுக்காரர்களும் இவ்வடிவத்திற்கு அடிமையாகி விட்டார்கள். ஜப்பானில் மாதத்திற்கு நாற்பதுக்கும் மேற்பட்ட காமிக்ஸ் பத்திரிகைகள் ஒவ்வொன்றும் சுமார் 300 பக்கங்கள் கொண்டதாக வெளிவருகின்றன. காமிக்ஸ் ஓவியர்கள் சினிமா நட்சத்திரங்கள் போல அங்கு நட்சத்திர அந்தஸ்து பெற்றிருக்கிறார்கள். இந்தக் காட்சிக் கலாச்சாரத்தை நாம் வளர்த்தெடுக்காததால் தான் உலகமொழியாகிய சினிமா நம்நாட்டில் மட்டும் பேசிக் கொண்டே இருப்பதாக எனக்குத் தோன்றுகிறது.

*****************************

மருதுவின் இந்தக் கட்டுரையில் தமிழ்காமிக்ஸ்களைப் பற்றி நேரடியாகப் பேசாவிட்டாலும் காமிக்ஸ் ரசிகனின் உணர்வுகளைச் சொல்கிறார். மேலும் நம்நாட்டில் போதுமான அங்கீகாரம் காமிக்ஸ்களுக்கு கிடைக்காததையும் ஆதங்கத்தோடு பதிவு செய்திருக்கிறார்.

ஆனாலும் தமிழில் வாசிக்க ஆரம்பித்தவர்களில் இன்றைய 25 வயது முதல் சுமார் 50 வயதுக்குட்பட்ட தலைமுறையினர் தமிழ்காமிக்ஸ்களை வாசித்திருப்பார்கள். அதன் இன்பம் அறிந்திருப்பார்கள் என்றே தோன்றுகிறது. மருது போன்ற மூத்த தலைமுறையினர் நேரடியாக வெளிநாட்டு காமிக்ஸ்களை வாசித்து வளர்ந்தது போலவே இன்றைய இளைய தலைமுறையும் காமிக்ஸ் என்றால் ஆங்கில காமிக்ஸ் புத்தகங்களை மட்டுமே கண்டு வளர்வதை காண முடிகிறது. காமிக்ஸ் கதாபாத்திரங்களை தொலைக்காட்சித் திரையில் காட்டூன் சானல்களிலும் சினிமாத்திரையிலும் அசைபடமாகவே கண்டு விடுகிறார்கள். இன்னமும் நூலிழையில் உயிர்வாழும் முத்துகாமிக்ஸ் போன்ற தமிழ் காமிக்ஸ் இதழ்களை அடுத்த தலைமுறைக்கு அறிமுகம் செய்ய நம்மாலான முயற்சியாக தமிழ் காமிக்ஸ் உலகம் போன்ற வலைப்பதிவுகளும் உதவட்டும்.

காமிக்ஸ் நினைவுகள்

2007-10-05T14:06:00.000+05:30

சூப்பர்மேன், ஸ்பைடர்மேன், பேட்மேன் என இன்று புகழ்பெற்று விளங்கும் திரைநாயகர்களும் காமிக்ஸ் கதாநாயகர்கள் அல்லவா? கார்ட்டூன் சானல் போன்றவை காமிக்ஸை அசைபடமாக காட்டுகின்றன. ஆனாலும் அந்தக் காலத்தில் சின்னஞ்சிறிய கையடக்க காமிக் புத்தகம் படித்த ஆனந்தம் இதில் கிட்டுவதாக தோன்றவில்லை. இப்போதைய குழந்தைகளுக்கு வருங்காலத்திய நினைவுகளாக புத்தகங்களுக்கு பதிலாக தொலைக்காட்சி கதைகள் தான் இருக்கக் கூடும்.

இரும்புக் கை மாயாவி தான் நம்ம பேவரிட். அப்புறம் அந்த லாரன்ஸ் டேவிட்டும் பிடித்தமான நாயகர்கள். அதுக்கப்பறம் நிறைய காமிக்ஸ் கதாநாயகர்கள் வந்து போனாலும் பெரிய அளவில் கவரவில்லை. கதாநாயகர்களை விட காமிக்ஸ் படிப்பதே இன்பம் என்ற நிலையில் மாற்றமில்லை. எங்கே காமிக்ஸ் புத்தகம் கண்டாலும் படிக்காமல் விடுவதில்லை இன்று வரைக்கும்.

மற்ற காமிக்ஸ் புத்தகங்கள் கிடைக்காமல் போன நிலையில் வாங்கிய ராணிகாமிக்ஸ் புத்தகங்கள் இன்னமும் பரணில் பழைய அட்டைப்பெட்டியில் கிடக்கின்றன. தூசிதட்டி எடுத்து அடுக்கும் போது இப்போதும் ஓரிரண்டை எடுத்து படித்து விட்டுத் தான் வைக்கமுடிகிறது.

காமிக்ஸ் புத்தகங்களின் முக்கிய விஷயமே அதிலுள்ள ஓவியங்கள் தான். இன்று சில நவீன வசதிகள் வந்து விட்டாலும் அச்சுக்கலையின் ஆரம்ப காலத்திலேயே காமிக்ஸ் புத்தகங்களுக்காக ஓவியங்கள் வரைந்து முகபாவனைகளில் கூட தனித்தன்மை காட்டிய அந்த ஓவியர்கள் மிகவும் பாராட்டுக் குரியவர்கள். இதைப்பற்றி ஓவியர் மருது கூட உயிர்மையில் ஒரு தொடர் எழுதி இருந்தார்.

பட்டைய கிளப்புது லயன் காமிக்ஸ்

2007-07-24T06:03:00.000+05:30

1984ஆம் ஆண்டு முதல் தொடர்ந்து (?) வெளிவந்து கொண்டிருக்கும் லயன் காமிக்ஸின் 200வது இதழ் இப்போது கடைகளில் கிடைக்கிறது. காமிக்ஸ் ரசிகர்கள் பெரும்பாலோனோர் விரும்பி படிக்கும் Cowboy கதைகளை Digest ஆக தொகுத்து செம கலக்கலாக வந்திருக்கிறது Cowboy Special. விலை நூறே ரூபாய் தான். எல்லாம் புத்தக கடைகளிலும் கிடைக்கிறது. இந்த இதழின் சிறப்பம்சங்களில் சில :

லக்கிலுக் சாகஸம் முழு வண்ணத்தில்

டெக்ஸ்வில்லரின் அதிரடி - மாறுபட்ட ஓவியங்களில்

சிஸ்கோ கிட், ஸ்டீவ் சாகஸங்கள்

கேப்டன் டைகரின் இளமைக்கால போராட்டம்

போனஸாக "தொபுக்கடீர்" என்று Cowboy ஸ்பெஷலில் குதித்திருக்கிறார் இரும்புக்கை மாயாவி

ஒரே ஏமாற்றம் : வுட்சிடி கோமாளி கும்பலின் கும்மாளம் மிஸ்ஸிங் :(

நமது நேரத்தை சாட்டிலைட் டிவிக்கள் தின்று கொண்டிருக்கும் மோசமான காலக்கட்டம் இது. வாசிக்கும் பழக்கத்தை உங்களுக்கு மீண்டும் ஏற்படுத்திக் கொள்ள அல்லது உங்கள் குழந்தைகளுக்கு வாசிக்கும் பழக்கத்தை கற்றுக் கொடுக்க இந்த இதழை பயன்படுத்திக் கொள்ளுங்கள். காமிக்ஸ் வாசிப்பு எவ்வளவு சுகமானது என்பது அதை அனுபவித்தவர்களுக்கே தெரியும்.

காமிக்ஸ் ரசிகர்களுக்கு இரத்தப் படலம் என்ற தொடர்கதையை நன்கு நினைவிருக்கும். கிட்டத்தட்ட 20 ஆண்டுகாலமாக லயன் காமிக்ஸில் இடம்பெற்றுவரும் காமிக்ஸ் காவியம். கிட்டத்தட்ட 18 தொகுதிகளையும் சேர்த்து ஒரே காமிக்ஸாக அடுத்த ஆண்டு வெளியிட லயன் காமிக்ஸ் நிறுவனத்தார் திட்டமிட்டிருக்கிறார்கள். இதுகுறித்த அறிவிப்பும் 200வது இதழில் இருக்கிறது.

லயன் காமிக்ஸ் ஆசிரியரின் ஹாட்லைனை படிக்கும் போது மிகுந்த சிரமத்துக்கிடையே காமிக்ஸினை வெளிகொண்டு வருவதாகத் தெரிகிறது. முன்னாள் வாசகர்களும், காமிக்ஸ் ரசிகர்களும் அவரது சிரமத்தைப் போக்கவேண்டிய அவசியம் இருக்கிறது. இல்லையேல் தமிழில் ஒண்ணே ஒண்ணு, கண்ணே கண்ணு என்று வந்துகொண்டிருக்கும் லயன், முத்து காமிக்ஸுகளுக்கும் விரைவில் மூடுவிழா வந்துவிடும் :(

மகிழ்ச்சியான பின்குறிப்பு : நான் எப்போதோ எழுதிய "காமிக்ஸ் ரசிகர்களுக்கு" பதிவில் இன்று காலை லயன் காமிக்ஸ் ஆசிரியர் எஸ்.விஜயன் பின்னூட்டமிட்டு என்னை கவுரவப்படுத்தியிருக்கிறார் :-)

லக்கிலூக் பதிவில் இருந்து மீள்பதிவாக்கப்பட்டது...மூலத்தை பார்க்க

காமிக்ஸ் ரசிகர்களுக்கு

2007-07-24T06:01:00.000+05:30

நண்பர் இளவஞ்சி என்னுடைய பதிவொன்றில் தன்னுடைய காமிக்ஸ் ரசிப்புத் தன்மையை வெளிப்படுத்தியிருந்தார்....

நானும் ஒரு காமிக்ஸ் ரசிகன் என்ற முறையில் இது குறித்து ஒரு பதிவொன்று போடலாம் என்று முடிவு செய்தேன்....

தமிழில் காமிக்ஸ் என்பது 1960களில் வெளிவர ஆரம்பித்தது... எனக்குத் தெரிந்து "மாலை மதி" முதலில் காமிக்சாக 1960களின் மத்தியில் வந்தது.... அமெரிக்க மற்றும் ஐரோப்பிய காமிக்ஸ்களின் உரிமையை வாங்கி தமிழில் மொழிபெயர்ப்பு செய்து வெளியிட்டார்கள்....

ஆனாலும் தமிழ் காமிக்ஸின் பொற்காலம் ஆரம்பமானது முத்து காமிக்ஸ் தோன்றிய பிறகே.... 1971ஆம் ஆண்டு தொடங்கப்பட்ட முத்து காமிக்ஸின் முதல் கதை இரும்புக்கை மாயாவி.... 128 பக்கங்கள் கொண்ட அந்தப் புத்தகத்தின் விலை அப்போதே 90 காசு.... முல்லை தங்கராசன் என்பவரை பொறுப்பாசிரியராக கொண்டு முத்து காமிக்ஸ் ராஜநடை போடத் தொடங்கியது....

பெரும் வரவேற்பின் காரணமாக முத்து காமிக்ஸ் 80களின் ஆரம்பத்தில் முத்து காமிக்ஸ் வாரமலர் (தினமலர் வாரமலருக்கே அது தான் முன்னோடி) என்ற ஒரு இதழைத் தொடங்கியது.... ஆனாலும் மாத இதழுக்கு கிடைத்த வரவேற்பு வார இதழுக்கு கிடைக்காததால் அது கொஞ்சம் ஆண்டுகளிலேயே நிறுத்தப் பட்டு விட்டது....

முத்து காமிக்ஸின் அபார வெற்றியைத் தொடர்ந்து அதே நிறுவனத்தார் 1984ஆம் ஆண்டு லயன் காமிக்ஸ் என்ற புதிய காமிக்ஸ் இதழையும் தொடங்கினார்கள்.... முத்து காமிக்ஸின் உரிமையாளர் தன் மகனுக்காக தொடங்கிய காமிக்ஸ் அது.... அவரது மகன் விஜயன் லயன் காமிக்ஸின் ஆசிரியராக பொறுப்பேற்ற போது அவரது வயது 17.

இதே ஆண்டில் பிரபல தினத்தந்தி குழுமமும் காமிக்சுகளுக்கு இருக்கும் ஆர்வத்தைப் பார்த்து தானும் ராணி காமிக்ஸ் தொடங்கியது.... 1984 முதல் சுமார் பத்து ஆண்டுகளுக்கு காமிக்ஸ் விற்பனை தமிழ்நாட்டில் கொடிகட்டி பறக்க ஆரம்பித்தது.... குறிப்பாக Cowboy கதைகளை தமிழக குழந்தைகளும், இளைஞர்களும் பரவலாக ரசிக்க ஆரம்பித்தார்கள்....

லயன் காமிக்சும் தன் சாம்ராஜ்யத்தை ஜூனியர் லயன், மினி லயன், திகில் காமிக்ஸ் என்று புதுப் புது காமிக்ஸ்களைத் தொடங்கி விரிக்க ஆரம்பித்தது....

இந்தக் காலக்கட்டத்தில் குழந்தைப் பருவத்தில் இருந்த நானும் காமிக்ஸுகளுக்கு அடிமை ஆனேன்... அதுவும் லயன் காமிக்ஸ் தீபாவளி, கோடை விடுமுறை, பொங்கல் ஆகிய சமயங்களில் Digest போன்று ஸ்பெஷல் இதழ் வெளியிடுவார்கள்... அவற்றைப் படிக்க பெரும் ஆர்வம் காட்டுவேன்... 1987ஆம் ஆண்டு லயன் காமிக்ஸ் தீபாவளி மலராக வெளியிட்ட சூப்பர் ஸ்பெஷல் 10 ரூபாய் என விலை நிர்ணயிக்கப்பட்டு பெரும் வெற்றி பெற்றது.... சமீபத்தில் அந்த இதழ் ஒன்றினை ரூ. 500 பிரீமியம் செலுத்தி வாங்கினேன்....

என் காலக்கட்டத்தில் காமிக்ஸ் படித்த சிலர் இன்னமும் காமிக்ஸ் ஆர்வம் கொண்டிருக்கிறார்கள் (நானும் தான்) .... நிறைய பேர் படித்த காமிக்ஸ்களை கலெக்டு செய்தும் வைத்திருக்கிறார்கள்.... நான் கிட்டத்தட்ட 85 சதம் லயன் காமிக்ஸ் வைத்திருக்கிறேன்....

1993-94களில் தனியார் தொலைக்காட்சிகள் வந்தபிறகு குழந்தைகளுக்கும், இளைஞர்களுக்கும் காமிக்ஸ் மோகம் குறைய ஆரம்பித்தது.... ராணி காமிக்ஸ் தாக்குப் பிடிக்க முடியாமல் 500 இதழ்களோடு தன் கணக்கை முடித்துக் கொண்டது.... மினி லயன், ஜூனியர் லயன், திகில் இதழ்களும் ஊத்தி மூடிக்கொண்டன....

இப்போதும் மிஞ்சி நிற்பது முத்து மற்றும் லயன் காமிக்ஸ்கள் மட்டுமே.... இந்த கோடை விடுமுறைக்கு லயன் காமிக்ஸ் வெளியிட்டிருக்கும் இதழின் விலை என்ன தெரியுமா? ரூபாய். 100/-.... என்னைப் போன்ற ஒரு சிலர் அதையும் வாங்கிக் கொண்டு தான் இருக்கிறோம்....

யாராவது Ex-காமிக்ஸ் ரசிகர்கள் இருந்தால் சொல்லுங்கள்.... மீண்டும் நீங்கள் காமிக்ஸ் படிக்க நான் உதவுகிறேன்... காமிக்ஸ் படிப்பதால் ஒரு பெரிய நன்மை என்னவென்றால் நம் வயது 20 வருடம் குறைந்தது போல உணருகிறோம்....

அறிவியலால் கண்டுபிடிக்க முடியாத கால இயந்திரந்தின் பயனை காமிக்ஸ் படிப்பது மூலம் நாம் அடையலாம்.....

லக்கிலூக் பதிவில் இருந்து மீள்பதிவு

அறிமுக ஹாட்லைன்

2007-07-17T16:18:00.000+05:30

தமிழ் காமிக்ஸ் உலகை பற்றி எழுதவேண்டும் என்று ஆரம்பிக்கப்படும் கூட்டு வலைப்பதிவு...!!!

இப்போதைக்கு இணைந்துள்ள நண்பர்கள் !!!

லக்கிலுக்
சிந்தாநதி
எஸ்.பாலபாரதி
செந்தழல் ரவி